కేఎల్‌ విశ్వవిద్యాలయ గ్రంథాలయంలో అగ్నిప్రమాదం

మంగళగిరి, అక్టోబర్‌ 2: తాడేపల్లి మండల పరిధిలోని కేఎల్‌ విశ్వవిద్యాలయ గ్రంథాలయ భవనంలో గురువారం రాత్రి అగ్నిప్రమాదం సంభవించింది. నాలుగో అంతస్తులోని శీతలీకరణ యంత్రంలో విద్యుత్‌ అంతరాయం ఏర్పడి మంటలు చెలరేగినట్లు ప్రాథమికంగా భావిస్తున్నారు. పేలుడు శబ్దాలు వినిపించడంతోపాటు అగ్నికీలలు భవనం వెలుపలకు కనిపించడంతో ప్రాంగణంలోని విద్యార్థులు, సిబ్బంది భయాందోళనకు గురయ్యారు. వెంటనే అప్రమత్తమైన భద్రతా సిబ్బంది మంగళగిరి అగ్నిమాపక కేంద్రానికి సమాచారం అందించారు. గ్రంథాలయ భవనంలో ఏర్పాటు చేసిన అగ్నిమాపక వ్యవస్థ నుంచి నీరు విడుదల కావడంతో మంటలు కొంతవరకు అదుపులోకి వచ్చాయి. అనంతరం ఘటనా స్థలానికి చేరుకున్న అగ్నిమాపక సిబ్బంది మంటలను పూర్తిగా అదుపుచేశారు. ఈ ఘటనలో ఎవరికీ ఎలాంటి ప్రమాదం జరగకపోవడంతో అందరూ ఊపిరిపీల్చుకున్నారు.