రూ.30,156 కోట్లతో భారీ ప్రాజెక్టు

అమరావతి, అక్టోబర్‌ 5: రాష్ట్రంలోని ప్రతి కుటుంబానికీ సురక్షితమైన తాగునీరు అందించడమే లక్ష్యంగా ప్రభుత్వం భారీ కార్యక్రమానికి శ్రీకారం చుట్టింది. జల్‌జీవన్‌ మిషన్‌ 2.0లో భాగంగా రూపొందించిన ‘అమరావతి జలధార’ పథకాన్ని కడపలో ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్‌ కల్యాణ్‌ ప్రారంభించారు. ఈ పథకానికి ప్రభుత్వం రూ.30,156.12 కోట్ల వ్యయాన్ని అంచనా వేసింది. రాష్ట్రవ్యాప్తంగా తాగునీటి సరఫరా వ్యవస్థను బలోపేతం చేయడంతోపాటు కొత్తగా 27.36 లక్షల కుటుంబాలకు కుళాయి కనెక్షన్లు అందించాలని లక్ష్యంగా నిర్ణయించింది. అమరావతి జలధార ద్వారా గ్రామీణ ప్రాంతాల్లో రక్షిత తాగునీటి సమస్యలకు శాశ్వత పరిష్కారం చూపాలని ప్రభుత్వం భావిస్తోంది. నీటి వనరుల అభివృద్ధి, పైపులైన్ల నిర్మాణం, నిల్వ సామర్థ్యం పెంపుతోపాటు సరఫరా వ్యవస్థల ఆధునికీకరణకు ప్రాధాన్యం ఇవ్వనుంది. ఈ ప్రాజెక్టులో భాగంగా రాష్ట్రవ్యాప్తంగా మొత్తం 50,315 అభివృద్ధి పనులు చేపట్టనున్నట్లు ప్రభుత్వం వెల్లడించింది. పథకం పూర్తయితే లక్షలాది కుటుంబాలకు ఇంటి వద్దకే సురక్షితమైన తాగునీరు అందుబాటులోకి రానుంది.