ఇందిరమ్మ ఇళ్లకు అక్టోబర్‌లో నిధుల జమ

హైదరాబాద్, ఆగస్టు 27: తెలంగాణలో గ్రామీణ ప్రాంతాల్లో అమలవుతున్న ఇందిరమ్మ ఇళ్ల పథకానికి కేంద్ర ప్రభుత్వం సహకరించేందుకు ముందుకు వచ్చిందని మంత్రి పొంగులేటి శ్రీనివాసరెడ్డి తెలిపారు. ఇందుకు సంబంధించి ఇప్పటికే కేంద్రం నుంచి సానుకూల స్పందన లభించినట్లు వెల్లడించారు.

ఈ ఏడాది మార్చి 31వ తేదీ వరకు గ్రామీణ ప్రాంతాల్లో పూర్తయిన 15,475 ఇందిరమ్మ ఇళ్లకు రాష్ట్ర ప్రభుత్వం ఇప్పటికే రూ.185 కోట్లు విడుదల చేసినట్లు మంత్రి తెలిపారు.

ఈ మొత్తాన్ని ప్రస్తుతం లబ్ధిదారుల ఖాతాల్లో జమ చేసే ప్రక్రియకు చర్యలు చేపట్టామని పేర్కొన్నారు. అక్టోబర్‌లో లబ్ధిదారుల ఖాతాల్లో నిధులు జమ చేస్తామని వెల్లడించారు.

గ్రామీణ పేదలకు సొంతింటి కలను సాకారం చేయడమే లక్ష్యంగా ఇందిరమ్మ ఇళ్ల పథకాన్ని ప్రభుత్వం ముందుకు తీసుకెళ్తోందని, కేంద్ర సహకారంతో పథకం అమలుకు మరింత ఊతం లభిస్తుందని మంత్రి పేర్కొన్నారు.