ఆటో వెనుక పోలీసుల వేట.. సొత్తు సురక్షితం

విజయవాడ, అక్టోబర్‌ 3: రాపిడో ఆటోలో మహిళ మరిచిపోయిన విలువైన ఆభరణాల బ్యాగును అజిత్‌సింగ్‌నగర్‌ పోలీసులు అరగంటలోనే గుర్తించి ఆమెకు అప్పగించారు. శనివారం రాత్రి ఓ మహిళ విజయవాడ రైల్వేస్టేషన్‌ నుంచి అజిత్‌సింగ్‌నగర్‌లోని జయమ్మ కంటి ఆసుపత్రికి రాపిడో ఆటోలో వచ్చారు. రాత్రి సుమారు 7.45 గంటలకు ఆసుపత్రి వద్ద దిగుతున్న సమయంలో బంగారు ఆభరణాలు, వెండి పట్టీలు, ఏటీఎం కార్డులు, ఇతర విలువైన వస్తువులు ఉన్న బ్యాగును ఆటోలోనే మరిచిపోయారు. కొద్దిసేపటి తరువాత విషయాన్ని గుర్తించిన బాధితురాలు అజిత్‌సింగ్‌నగర్‌ పోలీసులను ఆశ్రయించారు. వెంటనే స్పందించిన పోలీసులు రాపిడో బుకింగ్‌ వివరాలు, అందుబాటులో ఉన్న సాంకేతిక సమాచారాన్ని సేకరించారు. ప్రత్యేక బృందాలను రంగంలోకి దించి బీఆర్‌టీఎస్‌ రోడ్డుపై వెళ్తున్న సంబంధిత ఆటోను గుర్తించారు. సుమారు అరగంటలోనే ఆటోను ట్రేస్‌ చేసి అందులో ఉన్న బ్యాగును స్వాధీనం చేసుకున్నారు. బ్యాగులోని బంగారు ఆభరణాలు, వెండి పట్టీలు, ఏటీఎం కార్డులు, ఇతర వస్తువులు భద్రంగా ఉన్నట్లు నిర్ధారించి బాధితురాలికి అప్పగించారు. విలువైన వస్తువులను వేగంగా గుర్తించి అందించిన పోలీసులకు బాధితురాలు కృతజ్ఞతలు తెలిపారు. అజిత్‌సింగ్‌నగర్‌ పోలీసుల తక్షణ స్పందన, సమన్వయం, సాంకేతిక పరిజ్ఞానం వినియోగంపై పలువురు ప్రశంసలు వ్యక్తం చేశారు.