కూలిన చెట్లు.. అప్రమత్తమైన యంత్రాంగం

విజయవాడ, సెప్టెంబర్‌ 24: అల్పపీడన ప్రభావంతో రెండు రోజులుగా వర్షాలు కురుస్తున్న నేపథ్యంలో ప్రజలు అప్రమత్తంగా ఉండాలని తూర్పు నియోజకవర్గ ఎమ్మెల్యే గద్దె రామమోహన్‌ సూచించారు. వర్షాలు, బలమైన గాలులతో నియోజకవర్గంలో ఏర్పడిన పరిస్థితులను గురువారం ఆయన పరిశీలించారు. ఆరో డివిజన్‌ గుమ్మడి బజారులో నేలకూలిన పెద్ద వృక్షాన్ని, 19వ డివిజన్‌ పకీరుగూడెం కమ్యూనిటీ హాలు సమీపంలో ఓ ఇంటిపై పడిన భారీ చెట్టును ఎమ్మెల్యే పరిశీలించారు. కూలిన చెట్లను వెంటనే తొలగించి ప్రజలకు ఇబ్బందులు లేకుండా చర్యలు చేపట్టాలని నగరపాలక సంస్థ అధికారులను ఆదేశించారు. వర్షాలు కొనసాగుతున్నందున ప్రజలు అవసరమైన జాగ్రత్తలు పాటించాలని గద్దె రామమోహన్‌ కోరారు.

కొండ ప్రాంతాల్లో నివసించే ప్రజలు మరింత అప్రమత్తంగా ఉండాలని, కొండరాళ్లు జారిపడే ప్రమాదమున్న ప్రాంతాలను ముందుగానే గుర్తించి సమాచారం అందించాలని సూచించారు. అలాంటి ప్రాంతాల్లో అధికారులను పంపించి రక్షణ చర్యలు చేపడతామని తెలిపారు. పురాతన భవనాలు, భారీ చెట్ల సమీపంలో నివసిస్తున్నవారు కూడా జాగ్రత్తగా ఉండాలన్నారు. వర్షాలతో నష్టపోయిన బాధితులకు ప్రభుత్వం అండగా ఉంటుందని హామీ ఇచ్చారు. కార్యక్రమంలో పడాల గంగాధర్‌, భాగం సాయిప్రసాద్‌, రత్న రమేష్‌, పడమట సతీష్‌చంద్ర, దయాల శిరీష గాంధీ, పడాల వాసు, దున్న యేసురత్నం, నిమ్మల జ్యోతి, కోటివిడతల కోటేశ్వరరావు, పునుగుపాటి మోహన్‌రావు, పరసా రఘు, పడాల నాగు తదితరులు పాల్గొన్నారు.