సామాన్య భక్తుల రద్దీకి వీఐపీ దర్శనాల విరామం

విజయవాడ, అక్టోబర్‌ 4: వరుస సెలవుల నేపథ్యంలో విజయవాడ ఇంద్రకీలాద్రిపై భక్తుల రద్దీ అనూహ్యంగా పెరిగింది. కనకదుర్గమ్మ దర్శనం కోసం వివిధ ప్రాంతాల నుంచి భక్తులు పెద్ద సంఖ్యలో తరలిరావడంతో క్యూలైన్లు కిటకిటలాడాయి. భక్తుల రద్దీతోపాటు ఘాట్‌ రోడ్డులో మరమ్మతు పనులు జరుగుతున్న నేపథ్యంలో ఆదివారం ప్రోటోకాల్‌, వీఐపీ దర్శనాలను తాత్కాలికంగా నిలిపివేశారు. ఉదయం 8 గంటల నుంచి మధ్యాహ్నం 3 గంటల వరకు వీఐపీ దర్శనాలకు అనుమతి ఉండదని ఆలయ అధికారులు వెల్లడించారు. సామాన్య భక్తులకు ఇబ్బందులు కలగకుండా క్యూలైన్లను క్రమబద్ధీకరిస్తూ దర్శనానికి పంపిస్తున్నారు. రద్దీని దృష్టిలో ఉంచుకొని ఆలయ పరిసరాల్లో అదనపు సిబ్బందిని నియమించి, తాగునీరు తదితర సౌకర్యాలను అందుబాటులో ఉంచారు. భక్తులు అధికారుల సూచనలు పాటిస్తూ దర్శనం చేసుకోవాలని ఆలయ అధికారులు కోరారు.