ఎన్టీఆర్‌ జిల్లాలో నేడు బడులకు సెలవు

విజయవాడ , సెప్టెంబర్ 23 : ఎన్టీఆర్‌ జిల్లాలో కురుస్తున్న భారీ వర్షాలు, ప్రతికూల వాతావరణ పరిస్థితుల నేపథ్యంలో బుధవారం జిల్లావ్యాప్తంగా పాఠశాలలకు సెలవు ప్రకటించారు. విద్యార్థుల భద్రతను దృష్టిలో ఉంచుకుని అన్ని ప్రభుత్వ, ప్రైవేటు, ఇతర యాజమాన్యాల పరిధిలోని పాఠశాలలకు సెలవు వర్తిస్తుందని జిల్లా విద్యాశాఖ వెల్లడించింది. ఎట్టి పరిస్థితుల్లోనూ పాఠశాలలను నిర్వహించరాదని, విద్యార్థులను తరగతులకు పిలిపించవద్దని ప్రధానోపాధ్యాయులు, ప్రిన్సిపాళ్లను ఆదేశించింది. సెలవు సమాచారాన్ని విద్యార్థులు, తల్లిదండ్రులు, ఉపాధ్యాయులకు వెంటనే తెలియజేయాలని సూచించింది. ఉప విద్యాశాఖాధికారులు, మండల విద్యాశాఖాధికారులు తమ పరిధిలోని ప్రతి పాఠశాలకు సమాచారం చేరేలా చర్యలు చేపట్టాలని స్పష్టం చేసింది. వర్షాలు, వరదలు లేదా ఇతర ప్రమాదకర పరిస్థితులు నెలకొన్న ప్రాంతాల్లో ప్రత్యేక జాగ్రత్తలు పాటించాలని అధికారులు సూచించారు. విద్యార్థులు, సిబ్బంది అనవసర ప్రయాణాలు చేయకుండా ఇళ్లలోనే సురక్షితంగా ఉండాలని కోరారు. పాఠశాలల పునఃప్రారంభం, తదుపరి విద్యా కార్యక్రమాలపై అధికారికంగా సమాచారం వెల్లడిస్తామని జిల్లా విద్యాశాఖ తెలిపింది.