రూ.50 వేల లంచం తీసుకుంటూ డీఆర్వో పట్టివేత
ఉద్యోగి బకాయిలు, వార్షిక ఇంక్రిమెంట్ల బిల్లుల ఆమోదానికి డబ్బు డిమాండ్‌ పాడేరు ఆర్డీవో కార్యాలయంలో ఏసీబీ అధికారుల దాడి రసాయన పరీక్షలో సానుకూల ఫలితం వచ్చినట్లు అధికారుల వెల్లడి
పాడేరు, సెప్టెంబర్ 24: అల్లూరి సీతారామరాజు జిల్లా రెవెన్యూ అధికారి పూర్తి అదనపు బాధ్యతలు నిర్వహిస్తున్న మారోతు వెంకట సూర్య లోకేశ్వరరావు రూ.50 వేల లంచం స్వీకరిస్తూ ఏసీబీ అధికారులకు చిక్కారు. బుధవారం పాడేరు ఆర్డీవో కార్యాలయంలో ఏసీబీ విశాఖపట్నం రేంజ్‌ అధికారులు దాడి చేసి ఆయనను అదుపులోకి తీసుకున్నారు. కలెక్టరేట్‌లో జూనియర్‌ అసిస్టెంట్‌గా పనిచేస్తున్న అమ్ము సూర్యచక్రవర్తికి సంబంధించిన జీత బకాయిలు, పెండింగ్‌ వార్షిక ఇంక్రిమెంట్లు, వేతన శ్రేణి క్రమబద్ధీకరణ బిల్లుల ఆమోదానికి లోకేశ్వరరావు రూ.50 వేలు డిమాండ్‌ చేసినట్లు ఏసీబీ అధికారులు తెలిపారు. దీంతో బాధిత ఉద్యోగి ఏసీబీ అధికారులను ఆశ్రయించి ఫిర్యాదు చేశారు. ఫిర్యాదు మేరకు పథకం రూపొందించిన ఏసీబీ బృందం పాడేరు ఆర్డీవో కార్యాలయంలో నిఘా పెట్టింది. బాధితుడి నుంచి రూ.50 వేల నగదు స్వీకరిస్తున్న సమయంలో లోకేశ్వరరావును పట్టుకొని నగదును స్వాధీనం చేసుకున్నట్లు అధికారులు వెల్లడించారు. అనంతరం నిర్వహించిన రసాయన పరీక్షలో సానుకూల ఫలితం వచ్చినట్లు పేర్కొన్నారు. ఘటనపై కేసు నమోదు చేసి తదుపరి దర్యాప్తు చేపట్టారు.
