ప్రజల నమ్మకాన్ని నిలబెట్టుకోవాలి!

ఉయ్యూరు, నవంబర్ 5 : మున్సిపల్ చైర్మన్ పదవి కేవలం హోదా మాత్రమే కాదని, ప్రజలకు సేవ చేసే గొప్ప బాధ్యత అని తెలుగుదేశం పార్టీ జాతీయ ఉపాధ్యక్షుడు, మాజీ ఎమ్మెల్సీ వై.వీ.బీ. రాజేంద్రప్రసాద్ పేర్కొన్నారు. ఉయ్యూరు మున్సిపల్ చైర్మన్‌గా ఘన విజయం సాధించిన చెదుర్తిపాటి ప్రవీణ్ కుమార్ గురువారం కుటుంబ సమేతంగా రాజేంద్రప్రసాద్ దంపతులను వారి స్వగృహంలో మర్యాదపూర్వకంగా కలిశారు. ఈ సందర్భంగా వారిని శాలువాలతో సత్కరించి కృతజ్ఞతలు తెలియజేసి ఆశీర్వాదం తీసుకున్నారు. ఈ సందర్భంగా ప్రవీణ్ కుమార్ మాట్లాడుతూ రాజకీయాల్లో తనకు తొలి అడుగుల నుంచి మార్గదర్శకత్వం వహించిన రాజేంద్రప్రసాద్ తన రాజకీయ గురువని పేర్కొన్నారు. రాజకీయ ఓనమాలు ఆయన వద్దే నేర్చుకున్నానని, ప్రతి సందర్భంలోనూ తనను ప్రోత్సహిస్తూ ముందుకు నడిపించారని తెలిపారు. ఉయ్యూరు మున్సిపల్ చైర్మన్‌గా ఎన్నిక కావడంలో ఆయన సహకారం, మార్గదర్శకత్వం ఎంతో కీలకమన్నారు. ప్రజలు తనపై ఉంచిన నమ్మకాన్ని వమ్ము చేయకుండా, ఆయన ఆశయాలకు అనుగుణంగా పట్టణ అభివృద్ధికి అంకితభావంతో కృషి చేస్తానని స్పష్టం చేశారు. అనంతరం రాజేంద్రప్రసాద్ దంపతులు నూతన చైర్మన్ ప్రవీణ్ కుమార్ దంపతులను శాలువాలతో సత్కరించి అభినందించారు. ప్రజలు ఇచ్చిన అవకాశాన్ని సద్వినియోగం చేసుకోవాలని, ప్రతి వార్డులోని సమస్యలను గుర్తించి పరిష్కారానికి చొరవ చూపాలని రాజేంద్రప్రసాద్ సూచించారు. కౌన్సిలర్లతో సమన్వయం చేసుకుంటూ మౌలిక సదుపాయాల కల్పన, పట్టణాభివృద్ధికి ప్రాధాన్యం ఇవ్వాలన్నారు. ప్రజల విశ్వాసాన్ని నిలబెట్టుకునేలా పాలన సాగించాలని, భవిష్యత్తులో మరింత ఉన్నత స్థాయికి ఎదగాలని ఆకాంక్షించారు. ఈ కార్యక్రమంలో మాజీ సర్పంచ్ యలమంచిలి భ్రమరాంబ, ప్రవీణ్ కుమార్ సతీమణి చెదుర్తిపాటి శ్యామల తదితరులు పాల్గొన్నారు.