చిల్లర గొడవ.. కండక్టర్ ప్రాణం తీసింది!

మణుగూరు, నవంబర్ 4: కేవలం చిల్లర డబ్బుల కోసం జరిగిన వివాదం ఓ మహిళా ఆర్టీసీ కండక్టర్ ప్రాణాలను బలితీసుకుంది. విధి నిర్వహణలో ఉన్న కండక్టర్‌ను ఓ ప్రయాణికురాలు బస్సులో నుంచి నెట్టివేయడంతో తీవ్రంగా గాయపడిన గుండ్ల ప్రవళిక (24) చికిత్స పొందుతూ మంగళవారం రాత్రి మృతి చెందారు. ఈ విషాద ఘటన భద్రాద్రి కొత్తగూడెం జిల్లాలో చోటుచేసుకుంది. అక్టోబర్ 25న మణుగూరు నుంచి భద్రాచలం వెళ్తున్న ఆర్టీసీ బస్సులో బానోత్ మౌనిక అనే మహిళ తన కుమారుడితో కలిసి ప్రయాణించింది. కుమారుడి టికెట్ కోసం రూ.100 నోటు ఇవ్వగా, కండక్టర్ ప్రవళిక రూ.10 టికెట్ జారీ చేసి మిగిలిన చిల్లర వివరాలను టికెట్ వెనుక రాసినట్లు సమాచారం. అయితే చిల్లర వెంటనే ఇవ్వాలని మౌనిక పట్టుబట్టడంతో ఇద్దరి మధ్య వాగ్వాదం జరిగింది. ఈ క్రమంలో మిట్టగూడెం సమీపంలో బస్సు కదులుతుండగా మౌనిక కండక్టర్‌ను కిందకు నెట్టివేసినట్లు ఆరోపణలు ఉన్నాయి. రోడ్డుపై నెట్టివేసినట్లు ఆరోపణలు ఉన్నాయి. రోడ్డుపై పడిపోయిన ప్రవళిక కాళ్లపై నుంచి బస్సు వెనుక చక్రాలు వెళ్లడంతో తీవ్ర గాయాలయ్యాయి. ఆమెను మెరుగైన చికిత్స కోసం హైదరాబాద్‌లోని ప్రైవేటు ఆసుపత్రికి తరలించారు. దాదాపు పది రోజులపాటు మృత్యువుతో పోరాడిన ప్రవళిక చివరకు కన్నుమూశారు. ఈ ఘటనపై కేసు నమోదు చేసిన పోలీసులు ప్రయాణికురాలు మౌనికను అక్టోబర్ 26న అరెస్టు చేసి కోర్టులో హాజరుపరిచారు. ప్రవళిక మృతితో ఆర్టీసీ కార్మిక సంఘాలు తీవ్ర దిగ్భ్రాంతి వ్యక్తం చేశాయి. బాధిత కుటుంబానికి న్యాయం చేయాలని, తగిన పరిహారం అందించాలని డిమాండ్ చేశాయి.