మున్సిపల్ ఎన్నికలపై సుప్రీం సంచలనం!

విజయవాడ, అక్టోబర్ 21: ఆంధ్రప్రదేశ్ మున్సిపల్ ఎన్నికల ప్రక్రియలో చోటుచేసుకున్న హింసాత్మక ఘటనలపై సుప్రీంకోర్టు కీలక ఆదేశాలు జారీ చేసింది. తమ అభ్యర్థులను నామినేషన్లు వేయకుండా అడ్డుకున్నారంటూ వైఎస్సార్ కాంగ్రెస్ పార్టీ దాఖలు చేసిన పిటిషన్‌పై బుధవారం విచారణ చేపట్టింది. శాంతిభద్రతల సమస్యల కారణంగా అభ్యర్థులు నామినేషన్లు దాఖలు చేయలేకపోయిన ప్రాంతాల్లో గడువు పొడిగించే అంశాన్ని పరిశీలించాలని రాష్ట్ర ఎన్నికల సంఘాన్ని ఆదేశించింది. అభ్యర్థుల ఫిర్యాదులు, వీడియో ఆధారాలను పరిశీలించి అక్టోబర్ 22లోగా నిర్ణయం తీసుకోవాలని స్పష్టం చేసింది. గడువు పొడిగించాలని ఎన్నికల సంఘం నిర్ణయిస్తే ఆ నిర్ణయం ప్రకటించినప్పటి నుంచి 48 గంటల అవకాశం కల్పించాలని పేర్కొంది. అభ్యర్థుల భద్రతకు తగిన పోలీసు బందోబస్తు ఏర్పాటు చేయాలని, నామినేషన్ కేంద్రాల వద్ద సీసీ కెమెరాలు ఉండాలని ఆదేశించింది. ఈ పరిణామంతో మున్సిపల్ ఎన్నికల ప్రక్రియలో రాష్ట్ర ఎన్నికల సంఘం తీసుకోబోయే నిర్ణయంపై ఉత్కంఠ నెలకొంది.