బెజవాడ మేయర్‌ స్థానం జనసేనకు: బొండా ఉమా

విజయవాడ, అక్టోబర్‌ 17: విజయవాడ నగరపాలక సంస్థ ఎన్నికల్లో పొత్తులో భాగంగా మేయర్‌ స్థానాన్ని జనసేనకు కేటాయించినట్లు ప్రభుత్వ విప్‌, సెంట్రల్‌ ఎమ్మెల్యే బొండా ఉమామహేశ్వరరావు వెల్లడించారు. కార్పొరేషన్‌ పరిధిలో వార్డుల కేటాయింపుపై తెలుగుదేశం, జనసేన, బీజేపీ నాయకులు చర్చిస్తున్నారని తెలిపారు. శనివారమే తుది నిర్ణయం తీసుకుని సీట్ల కేటాయింపులను ప్రకటిస్తామని చెప్పారు. మొగల్రాజపురంలోని తన నివాసంలో శనివారం నిర్వహించిన విలేకరుల సమావేశంలో ఆయన మాట్లాడారు. విజయవాడలో కూటమి పార్టీల మధ్య పూర్తి సమన్వయం, సఖ్యత ఉన్నాయని, పరస్పర చర్చలతో స్థానిక సంస్థల ఎన్నికలకు సిద్ధమవుతున్నామని స్పష్టం చేశారు. పుంగనూరులో శుక్రవారం జరిగిన ఘటనపై ఎన్నికల సంఘం తక్షణమే స్పందించి సమగ్ర విచారణ జరిపించాలని బొండా ఉమా డిమాండ్‌ చేశారు. బాధ్యులపై చట్టప్రకారం కఠిన చర్యలు తీసుకోవాలని కోరారు. ఎంపీ మిథున్‌రెడ్డి సభ్యత్వాన్ని రద్దు చేయడంతోపాటు భవిష్యత్తులో ఎన్నికల్లో పోటీ చేయకుండా అనర్హుడిగా ప్రకటించే అంశాన్ని పరిశీలించాలని అన్నారు. వైసీపీ గుర్తింపును రద్దు చేయాలని కూడా డిమాండ్‌ చేశారు. నామినేషన్ల ప్రక్రియలో మిథున్‌రెడ్డి వర్గీయులు ఎన్నికల నిబంధనలను ఉల్లంఘించారని ఉమా ఆరోపించారు. ఆయుధాలు, మద్యం సీసాలు, కత్తులతో కూడిన కాన్వాయ్‌ను వినియోగించారని, ఇందుకు సంబంధించిన వీడియోలు మీడియాలో ప్రసారమయ్యాయని పేర్కొన్నారు. దాడులకు పాల్పడిన వారిపై వర్తించే చట్టాల ప్రకారం కేసులు నమోదు చేయాలని కోరారు. స్థానిక సంస్థల ఎన్నికల వేళ రాష్ట్రంలో శాంతియుత వాతావరణాన్ని దెబ్బతీసే ప్రయత్నాలు జరుగుతున్నాయని ఆరోపించారు. తిరుపతిలో టీడీపీ అభ్యర్థి నుంచి మాజీ ఎమ్మెల్యే భూమన కరుణాకర్‌రెడ్డి నామినేషన్‌ పత్రాన్ని లాక్కున్నారని బొండా ఉమా ఆరోపించారు. పుంగనూరులో పెద్దిరెడ్డి, మిథున్‌రెడ్డి వర్గాల చర్యలను టీడీపీ శ్రేణులు ధైర్యంగా ఎదుర్కొన్నాయని చెప్పారు. తమ పార్టీ శ్రేణులు దాడులకు పాల్పడలేదని పేర్కొన్నారు. స్థానిక సంస్థల ఎన్నికల నిర్వహణకు కేంద్ర బలగాల అవసరం లేదని, రాష్ట్ర పోలీసు శాఖ సమర్థంగా ఎన్నికలను నిర్వహించగలదని ఆయన అభిప్రాయపడ్డారు. విజయవాడలో ఎన్నికలు ప్రశాంతంగా జరిగేలా అన్ని చర్యలు తీసుకుంటామని తెలిపారు. సమావేశంలో టీడీపీ రాష్ట్ర కార్యదర్శి, సెంట్రల్‌ నియోజకవర్గ సమన్వయకర్త నవనీతం సాంబశివరావు, దేవరపు మాల్యాద్రి పాల్గొన్నారు.