ఇంద్రకీలాద్రిపై దసరా సందడికి సర్వం సిద్ధం!

కొండపై నూతన పూజా మండపంలో ప్రత్యేక ఖడ్గమాలార్చన, కుంకుమార్చన, శ్రీచక్ర నవావరణార్చన నిర్వహించనున్నారు. ఆలయ యాగశాలలో ప్రతిరోజూ చండీహోమం జరుగుతుంది. దసరా ఉత్సవాల తొలి రోజైన అక్టోబర్ 11న వేకువజామున అమ్మవారికి విశేష స్నపనాభిషేకం, అలంకార పూజలు నిర్వహించిన అనంతరం ఉదయం 8 గంటలకు సర్వదర్శనం ప్రారంభమవుతుంది. ప్రతిరోజూ సాయంత్రం 4 గంటలకు శ్రీ మల్లేశ్వరస్వామి వారి దివ్య నగరోత్సవం నిర్వహించనున్నారు. మూడు షిఫ్టుల్లో 5 వేల మంది సేవలు దసరా ఉత్సవాలు ప్రశాంతంగా జరిగేందుకు దేవస్థానం, పోలీసు, ఇతర ప్రభుత్వ శాఖలు, పారిశుద్ధ్య విభాగాలకు చెందిన 5 వేల మందికి పైగా సిబ్బంది మూడు షిఫ్టుల్లో విధులు నిర్వహించనున్నారు. భక్తులకు ఇబ్బందులు తలెత్తకుండా నిరంతరం పర్యవేక్షణ కొనసాగిస్తామని ఈవో శీనా నాయక్ తెలిపారు. భక్తులు అధికారుల సూచనలు పాటిస్తూ నిర్దేశిత మార్గాల్లోనే రాకపోకలు సాగించాలని, క్రమశిక్షణతో అమ్మవారిని దర్శించుకోవాలని విజ్ఞప్తి చేశారు.