సమృద్ధిగా వర్షాలు కురిసి.. రాష్ట్రం సుభిక్షంగా ఉండాలి

విజయవాడ, అక్టోబరు 6: రాష్ట్రంలో సమృద్ధిగా వర్షాలు కురిసి, పంటలు పండి రైతులు సంతోషంగా ఉండాలని ఎన్టీఆర్‌ జిల్లా తెలుగుదేశం పార్టీ అధ్యక్షురాలు గద్దె అనురాధ ఆకాంక్షించారు. కృష్ణలంక స్టాండ్‌ వద్దనున్న శ్రీ కాళీమాత అమ్మవారి దేవస్థానంలో మంగళవారం నిర్వహించిన వరుణ యాగం పూర్ణాహుతిలో ఆమె పాల్గొని ప్రత్యేక పూజలు చేశారు. రాష్ట్ర ప్రభుత్వం ఆధ్వర్యంలో ఆలయ కమిటీ నేతృత్వంలో వేద పండితుల మంత్రోచ్చరణల నడుమ కార్యక్రమం భక్తిశ్రద్ధలతో సాగింది. ఈ సందర్భంగా అనురాధ మాట్లాడుతూ కృష్ణా, గోదావరితోపాటు రాష్ట్రంలోని జలవనరులన్నీ నిండుకుండల్లా మారి ఆంధ్రప్రదేశ్‌ సస్యశ్యామలంగా ఉండాలని అమ్మవారిని ప్రార్థించినట్లు తెలిపారు. ప్రతి నీటి చుక్కను సద్వినియోగం చేసుకునే లక్ష్యంతో ముఖ్యమంత్రి చంద్రబాబు నాయుడు

నేతృత్వంలోని కూటమి ప్రభుత్వం సాగునీటి ప్రాజెక్టులకు ప్రాధాన్యం ఇస్తోందన్నారు. పట్టిసీమ ద్వారా గోదావరి జలాలను కృష్ణా డెల్టాకు అందించిన ఘనత చంద్రబాబుకు దక్కుతుందని పేర్కొన్నారు. పోలవరం, వెలిగొండ, హంద్రీ–నీవాతోపాటు వివిధ ఎత్తిపోతల పథకాల పనులను వేగవంతం చేయడంపై ముఖ్యమంత్రి నిరంతరం సమీక్షిస్తున్నారని తెలిపారు. రాష్ట్రంలోని ప్రతి ప్రాంతానికి సాగునీరు, ప్రజలకు తాగునీరు సమృద్ధిగా అందాలన్న ప్రభుత్వ సంకల్పానికి దైవానుగ్రహం తోడవ్వాలని కోరుకున్నట్లు చెప్పారు. కార్యక్రమంలో ఆలయ కార్యదర్శి జగదీష్‌ కుమార్‌, ఆధ్యాత్మికవేత్త కిరణ్‌, ట్రస్ట్‌ బోర్డు సభ్యుడు తుర్లపాటి మల్లేశ్వరరావు, నాయకులు పెద్ది అన్నారావు, తోట శ్రీను, కోట శివలక్ష్మి, దుర్గారావు, శివ, రవి, ప్రసాద్‌ తదితరులు పాల్గొన్నారు.