పేదల సొంతింటి కల సాకారం చేస్తున్న చంద్రబాబుకు ఘన స్వాగతం

విజయవాడ, సెప్టెంబర్ 29: పేదల సొంతింటి కలను సాకారం చేసేందుకు విజయవాడకు వస్తున్న ముఖ్యమంత్రి నారా చంద్రబాబు నాయుడుకు ఘన స్వాగతం పలకాలని ప్రభుత్వ విప్, సెంట్రల్ ఎమ్మెల్యే బొండా ఉమామహేశ్వరరావు పిలుపునిచ్చారు. మంగళవారం సింగ్‌నగర్‌లోని సెంట్రల్ నియోజకవర్గ ఎమ్మెల్యే కార్యాలయంలో తెలుగుదేశం పార్టీ నాయకులు, కార్యకర్తలతో ఆయన సమావేశమయ్యారు. బుధవారం నిర్వహించనున్న ఇళ్ల పట్టాల పంపిణీ కార్యక్రమంతోపాటు ముఖ్యమంత్రి పర్యటన సందర్భంగా చేపట్టాల్సిన స్వాగత ఏర్పాట్లపై సమీక్షించారు. సెంట్రల్ నియోజకవర్గంలోని పేదల ఎన్నో ఏళ్ల సొంతింటి కలను నెరవేరుస్తూ ముఖ్యమంత్రి చేతుల మీదుగా పట్టాలను పంపిణీ చేయనున్నట్లు

బొండా ఉమా తెలిపారు. పట్టాల ద్వారా పేదలకు శాశ్వత హక్కుతోపాటు వారి కుటుంబాలకు భద్రత, భరోసా లభిస్తాయన్నారు. ఈ చారిత్రాత్మక కార్యక్రమాన్ని పేదల పండుగగా నిర్వహించాలని సూచించారు. పార్టీ నాయకులు, కార్యకర్తల సమన్వయం, లబ్ధిదారులు, వారి కుటుంబ సభ్యుల భాగస్వామ్యం, ప్రజలకు అవసరమైన సౌకర్యాలపై పలు సూచనలు చేశారు. కార్యక్రమానికి వచ్చే ప్రజలకు ఎలాంటి ఇబ్బందులు కలగకుండా ముందస్తు ఏర్పాట్లు పూర్తి చేయాలని ఆదేశించారు. పార్టీ నాయకులు, కార్యకర్తలు, అభిమానులు, లబ్ధిదారులు పెద్ద సంఖ్యలో పాల్గొని ముఖ్యమంత్రికి ఘన స్వాగతం పలకడంతోపాటు పట్టాల పంపిణీ కార్యక్రమాన్ని విజయవంతం చేయాలని బొండా ఉమా కోరారు.