బందరు గణపతి లడ్డూ రూ.25 లక్షలు
630 కిలోల మహా లడ్డూను దక్కించుకున్న గుమ్మడి భవానీ శంకర్‌ రూ.63 వేలతో మొదలైన వేలంలో పోటీపడిన 600 మంది భక్తులు రేపు వరసిద్ధి వినాయకస్వామి కల్యాణం అనంతరం మహా నిమజ్జనం
మచిలీపట్నం, సెప్టెంబర్ 24, వీ10టీవీ: బందరు సాగరతీర మహా గణపతి లడ్డూ వేలం ఉత్కంఠభరితంగా సాగింది. స్వామివారి 630 కిలోల భారీ లడ్డూ రూ.25 లక్షల ధర పలికింది. ఎఫ్‌సీఎస్‌ ట్రేడింగ్‌ ప్రైవేట్‌ లిమిటెడ్‌ అధినేత గుమ్మడి భవానీ శంకర్‌ అత్యధిక ధరకు లడ్డూను సొంతం చేసుకున్నారు. రూ.63 వేలతో ప్రారంభమైన వేలంపాటలో ప్రత్యక్షంగా, దృశ్య సమావేశం ద్వారా దాదాపు 600 మంది భక్తులు పాల్గొన్నారు. భారీ ధరకు లడ్డూను దక్కించుకున్న భవానీ శంకర్‌ను ఉత్సవ కమిటీ సభ్యులు అభినందించారు. స్వామివారి లడ్డూ ప్రసాదాన్ని ఆయనకు లాంఛనంగా అందజేయనున్నారు. శుక్రవారం నిర్వహించనున్న వరసిద్ధి వినాయకస్వామి కల్యాణంలో భవానీ శంకర్‌ దంపతులు ముఖ్యంగా పాల్గొననున్నారు. కల్యాణం అనంతరం నీటి జల్లుల యంత్రాల సహాయంతో 63 అడుగుల మహా గణపతి విగ్రహాన్ని నిమజ్జనం చేయనున్నట్లు ఉత్సవ కమిటీ తెలిపింది. అనంతరం భక్తులకు భారీ అన్నదానం ఏర్పాటు చేస్తున్నట్లు వెల్లడించింది.
