డిసెంబర్ 2 వరకు ఉద్యోగుల బదిలీలు, పదోన్నతులకు బ్రేక్!

విజయవాడ, అక్టోబర్ 15: ఆంధ్రప్రదేశ్‌లో స్థానిక సంస్థల ఎన్నికల నేపథ్యంలో ప్రభుత్వ ఉద్యోగుల బదిలీలు, పదోన్నతులపై ఆంక్షలు విధించేందుకు రాష్ట్ర ఎన్నికల సంఘం చర్యలు చేపట్టింది. ఎన్నికల ప్రవర్తనా నియమావళి అమలులో ఉన్న నేపథ్యంలో డిసెంబర్ 2వ తేదీ వరకు బదిలీలు, పదోన్నతులను నిలిపివేయాలని రాష్ట్ర ఎన్నికల కమిషనర్ అనిల్ చంద్ర పునేఠా ప్రభుత్వ ప్రధాన కార్యదర్శికి లేఖ రాసినట్లు సమాచారం. ఎన్నికల ప్రక్రియ పారదర్శకంగా, నిష్పక్షపాతంగా జరిగేందుకు ఈ చర్యలు చేపట్టినట్లు తెలుస్తోంది. అత్యవసర పరిస్థితుల్లో బదిలీలు లేదా పదోన్నతులు చేపట్టాల్సి వస్తే రాష్ట్ర ఎన్నికల సంఘం నుంచి ముందస్తు ప్రత్యేక అనుమతి పొందాల్సి ఉంటుంది. ఈ మేరకు అన్ని ప్రభుత్వ శాఖలకు తగిన ఆదేశాలు జారీ చేయాలని సీఎస్‌కు సూచించినట్లు సమాచారం.