పెడనలో పేదల వైద్యానికి రూ.59.45 లక్షల సాయం

పెడన, అక్టోబరు 7: పెడన నియోజకవర్గంలోని నిరుపేదల వైద్య అవసరాల కోసం ముఖ్యమంత్రి సహాయ నిధి ద్వారా మంజూరైన చెక్కులు, అత్యవసర వైద్య చికిత్స అనుమతి పత్రాలను ఎమ్మెల్యే కాగిత కృష్ణప్రసాద్‌ బుధవారం అందజేశారు. తోటమూలలోని తెలుగుదేశం పార్టీ కార్యాలయంలో నిర్వహించిన కార్యక్రమంలో బంటుమిల్లి, కృత్తివెన్ను, పెడన, గూడూరు మండలాలకు చెందిన 71 మంది లబ్ధిదారులకు మొత్తం రూ.59,45,468 విలువైన సహాయాన్ని పంపిణీ చేశారు. ఇందులో 55 చెక్కులు, 16 వైద్య

చికిత్స అనుమతి పత్రాలు ఉన్నాయి. ఈ సందర్భంగా ఎమ్మెల్యే మాట్లాడుతూ.. వైద్య ఖర్చులతో ఇబ్బందులు ఎదుర్కొంటున్న పేద కుటుంబాలకు ముఖ్యమంత్రి సహాయ నిధి అండగా నిలుస్తోందన్నారు. నిరుపేదల ఆరోగ్య భద్రతకు ముఖ్యమంత్రి చంద్రబాబు నాయుడు ప్రాధాన్యత ఇస్తున్నారని తెలిపారు. అర్హులైన బాధితులకు సకాలంలో సహాయం అందేలా అధికారులతో సమన్వయం చేస్తున్నట్లు చెప్పారు. వైద్య సహాయం మంజూరయ్యేందుకు కృషి చేసిన ఎమ్మెల్యేకు లబ్ధిదారులు కృతజ్ఞతలు తెలిపారు.