ఇంద్రకీలాద్రికి రాష్ట్రపతి ద్రౌపది ముర్ము

విజయవాడ, అక్టోబరు 1: దసరా శరన్నవరాత్రి ఉత్సవాల సందర్భంగా విజయవాడ ఇంద్రకీలాద్రిపై కొలువైన కనకదుర్గమ్మను దర్శించుకునేందుకు రాష్ట్రపతి ద్రౌపది ముర్ము ఈ నెల 14న నగరానికి రానున్నారు. రాష్ట్రపతి పర్యటన నేపథ్యంలో ఆలయంతోపాటు పరిసర ప్రాంతాల్లో చేపట్టాల్సిన భద్రతా ఏర్పాట్లపై అధికారులు ప్రత్యేక దృష్టి సారిస్తున్నారు. అమ్మవారి దర్శనం అనంతరం రాష్ట్రపతి విజయవాడ ఉత్సవంలోనూ పాల్గొనే అవకాశం ఉన్నట్లు తెలుస్తోంది. అధికారిక పర్యటనకు సంబంధించిన పూర్తి వివరాలు ఇంకా వెలువడాల్సి ఉంది. అక్టోబరు 11 నుంచి 20వ తేదీ వరకు దసరా ఉత్సవాలు నిర్వహించనున్న నేపథ్యంలో అధికారులు విస్తృత ఏర్పాట్లు చేస్తున్నారు.