ప్రభుత్వ సేవల్లో జాప్యం ఉండొద్దు!

అమరావతి, నవంబర్ 10: ప్రజలకు ప్రభుత్వ సేవలు అందించడంలో ఎలాంటి ఇబ్బందులు తలెత్తకుండా అధికారులు ప్రత్యేక శ్రద్ధ తీసుకోవాలని ముఖ్యమంత్రి నారా చంద్రబాబు నాయుడు ఆదేశించారు. వివిధ ప్రభుత్వ శాఖల పనితీరుపై నిర్వహించిన సమీక్షలో ఆయన అధికారులకు పలు సూచనలు చేశారు. వైద్యారోగ్య, పంచాయతీరాజ్, రిజిస్ట్రేషన్లు, రెవెన్యూ, ఇరిగేషన్, మెప్మా, సెర్ప్ శాఖల అధికారులు ఈ సమీక్షలో పాల్గొన్నారు. ఆయా శాఖల ద్వారా క్షేత్రస్థాయిలో ప్రజలకు అందుతున్న సేవలు, ఉద్యోగుల పనితీరుకు సంబంధించిన నివేదికలను ముఖ్యమంత్రి పరిశీలించారు. ప్రభుత్వ పథకాలు, సేవలు ప్రజలకు సకాలంలో అందేలా అధికారులు చర్యలు తీసుకోవాలని సూచించారు. ప్రజలు ప్రభుత్వ కార్యాలయాల చుట్టూ తిరగాల్సిన పరిస్థితులు తలెత్తకుండా సేవల అందజేతపై దృష్టి సారించాలని ఆదేశించారు. ప్రభుత్వ శాఖల పనితీరును మెరుగుపరచడంతో పాటు ప్రజలకు ఇబ్బందులు లేకుండా పరిపాలన కొనసాగించడమే లక్ష్యంగా పనిచేయాలని సీఎం చంద్రబాబు స్పష్టం చేశారు.