దసరా ఉత్సవాలకు డీకే శివకుమార్‌కు ఆహ్వానం

విజయవాడ, అక్టోబర్ 13: విజయవాడలో వైభవంగా జరుగుతున్న దసరా శరన్నవరాత్రి ఉత్సవాలు, విజయవాడ ఉత్సవ్‌–2.0 వేడుకలకు హాజరుకావాలని కర్ణాటక ఉప ముఖ్యమంత్రి డీకే శివకుమార్‌ను నరసరావుపేట ఎంపీ లావు శ్రీకృష్ణదేవరాయలు ఆహ్వానించారు. ఈ మేరకు డీకే శివకుమార్‌ను మర్యాదపూర్వకంగా కలిసి పుష్పగుచ్ఛం అందజేశారు. ఈ సందర్భంగా విజయవాడ ఇంద్రకీలాద్రిపై కొలువుదీరిన శ్రీ కనకదుర్గమ్మ అమ్మవారిని దర్శించుకుని ఆశీస్సులు పొందాలని కోరారు. దసరా ఉత్సవాల విశిష్టతను, విజయవాడ ఉత్సవ్‌–2.0 ప్రత్యేకతలను ఆయనకు వివరించారు.

విజయవాడ సంస్కృతి, సంప్రదాయాలు, కళా వైభవం, చారిత్రక వారసత్వాన్ని ప్రతిబింబించేలా నిర్వహిస్తున్న వేడుకలను ప్రత్యక్షంగా వీక్షించాలని ఎంపీ లావు శ్రీకృష్ణదేవరాయలు కోరారు. ఈ భేటీకి సంబంధించిన ఫొటో సామాజిక మాధ్యమాల్లో ప్రచారంలోకి వచ్చింది.