వైద్య చికిత్సకు రూ.6.40 లక్షల ఆర్థిక భరోసా!

విజయవాడ, నవంబర్ 9 : అనారోగ్య సమస్యలతో బాధపడుతున్న ఇద్దరికి మెరుగైన వైద్య చికిత్స అందించేందుకు విజయవాడ పశ్చిమ నియోజకవర్గ ఎమ్మెల్యే సుజనా చౌదరి చొరవతో ప్రభుత్వం రూ.6.40 లక్షల విలువైన రెండు లెటర్ ఆఫ్ క్రెడిట్ (ఎల్‌ఓసీ)లను మంజూరు చేసింది. సోమవారం భవానిపురంలోని ఎన్డీయే కార్యాలయంలో కార్యదర్శి ప్రత్తిపాటి శ్రీధర్ కూటమి నాయకులతో కలిసి బాధిత కుటుంబాలకు ఎల్‌ఓసీ పత్రాలను అందజేశారు. 45వ డివిజన్ కొత్తపేటకు చెందిన బి.హర్షిత (16) అండాశయ సంబంధిత అనారోగ్య సమస్యతో బాధపడుతూ వైద్య సహాయం కోసం దరఖాస్తు చేసుకున్నారు. ఆమె చికిత్స నిమిత్తం ప్రభుత్వం రూ.3.95 లక్షల విలువైన ఎల్‌ఓసీని మంజూరు చేసింది. అదేవిధంగా 56వ డివిజన్‌కు చెందిన పర్వీన్ (48) చెవి ఇన్ఫెక్షన్‌తో బాధపడుతూ వైద్య సహాయం కోరగా రూ.2.45 లక్షల విలువైన ఎల్‌ఓసీ మంజూరైంది. వైద్య సహాయం కోసం చేసిన విజ్ఞప్తులపై ఎమ్మెల్యే సుజనా చౌదరి స్పందించి ప్రభుత్వం నుంచి ఎల్‌ఓసీలు మంజూరు చేయించడంపై బాధిత కుటుంబ సభ్యులు హర్షం వ్యక్తం చేశారు. సకాలంలో వైద్య చికిత్స పొందేందుకు అవకాశం కల్పించిన ఎమ్మెల్యేకు కృతజ్ఞతలు తెలిపారు. ఈ కార్యక్రమంలో మాజీ కార్పొరేటర్ బుల్లా విజయ్, దుర్గమ్మ గుడి ట్రస్ట్ బోర్డు సభ్యుడు అవ్వారు శ్రీనివాసరావు, బీజేపీ నాయకుడు దేవిన హరిప్రసాద్ తదితరులు పాల్గొన్నారు.