అభివృద్ధి, సంక్షేమానికి సమ ప్రాధాన్యం

నందిగామ, సెప్టెంబర్ 30: నందిగామ నియోజకవర్గంలో అభివృద్ధి, సంక్షేమ కార్యక్రమాలకు సమ ప్రాధాన్యం ఇస్తున్నామని ప్రభుత్వ విప్, ఎమ్మెల్యే తంగిరాల సౌమ్య తెలిపారు. మంగళవారం నియోజకవర్గంలో నిర్వహించిన పలు కార్యక్రమాల్లో ఆమె పాల్గొన్నారు. అశోక్‌నగర్‌లోని సాంఘిక సంక్షేమ బాలుర వసతి గృహంలో విద్యార్థుల సౌకర్యార్థం దాతల సహకారంతో సమకూర్చిన 40 మంచాలను అందజేశారు. విద్యార్థులకు మెరుగైన వసతులు కల్పించేందుకు దాతలు అందిస్తున్న సహకారం మరువలేనిదని కొనియాడారు. విద్యార్థులు సౌకర్యాలను సద్వినియోగం చేసుకొని కష్టపడి చదివి ఉన్నత లక్ష్యాలను సాధించాలని ఆకాంక్షించారు. పల్లె పండుగ 3.0లో భాగంగా జుజ్జూరు గ్రామంలో రూ.80 లక్షలు, అల్లూరు ఎస్సీ కాలనీలో రూ.60 లక్షలతో నిర్మించనున్న సీసీ రోడ్డు పనులకు ఎమ్మెల్యే శంకుస్థాపన చేశారు. గ్రామీణ ప్రాంతాలు, పేదల కాలనీల్లో రహదారులు, డ్రైనేజీ, తాగునీరు వంటి మౌలిక వసతుల కల్పనకు ప్రభుత్వం ప్రాధాన్యం ఇస్తోందన్నారు. అనారోగ్యంతో ఇబ్బందులు ఎదుర్కొంటున్న పేద, మధ్యతరగతి కుటుంబాలకు ముఖ్యమంత్రి సహాయనిధి భరోసాగా నిలుస్తోందని సౌమ్య పేర్కొన్నారు. వీరులపాడు మండలానికి చెందిన 60 మంది లబ్ధిదారులకు రూ.25.51 లక్షల విలువైన సహాయనిధి చెక్కులను అందజేశారు. నందిగామ నియోజకవర్గవ్యాప్తంగా ఇప్పటివరకు 276 మందికి రూ.1,37,11,559 ఆర్థిక సహాయం మంజూరైనట్లు వెల్లడించారు. ఫోటో రైట్‌అప్: నందిగామ నియోజకవర్గంలో అభివృద్ధి, సంక్షేమ కార్యక్రమాల్లో పాల్గొన్న ప్రభుత్వ విప్, ఎమ్మెల్యే తంగిరాల సౌమ్య.