వేగవరంలో అంబేడ్కర్‌ విగ్రహ ఏర్పాటుపై ఉద్రిక్తత

వేగవరం, సెప్టెంబరు 26: ఏలూరు జిల్లా జంగారెడ్డిగూడెం మండలం వేగవరం గ్రామంలో డాక్టర్‌ బీఆర్‌ అంబేడ్కర్‌ విగ్రహ పునఃప్రతిష్ఠ వివాదాస్పదంగా మారింది. గతంలో విగ్రహం ఉన్న ప్రదేశంలోనే తిరిగి ఏర్పాటు చేసేందుకు ప్రయత్నించగా కొందరు స్థానికులు అభ్యంతరం వ్యక్తం చేశారు. దీంతో గ్రామంలో కొద్దిసేపు ఉద్రిక్త పరిస్థితి నెలకొంది. రహదారి విస్తరణ పనులకు అడ్డుగా ఉందన్న కారణంతో గతంలో స్థానికులతో చర్చించి విగ్రహాన్ని తొలగించారు. తాజాగా అదే ప్రాంతంలో పునఃప్రతిష్ఠించేందుకు ఏర్పాట్లు చేపట్టగా, విగ్రహం ఏర్పాటు చేసే స్థలంపై కొందరు అభ్యంతరం తెలిపారు. సమాచారం అందుకున్న పోలీసులు వెంటనే ఘటనాస్థలికి చేరుకుని పరిస్థితిని పర్యవేక్షించారు. ఎలాంటి అవాంఛనీయ ఘటనలు జరగకుండా ముందు జాగ్రత్త చర్యలు చేపట్టారు. సమస్య పరిష్కారానికి సంబంధిత వర్గాలతో అధికారులు చర్చలు జరుపుతున్నట్లు సమాచారం. ఘటనపై పూర్తి వివరాలు అధికారికంగా వెల్లడికావాల్సి ఉంది.