నేడు విజయవాడలో ముఖ్యమంత్రి చంద్రబాబు పర్యటన

విజయవాడ, సెప్టెంబర్‌ 30: ముఖ్యమంత్రి నారా చంద్రబాబు నాయుడు బుధవారం విజయవాడలో పర్యటించనున్నారు. మధ్యాహ్నం 2 గంటలకు నగరంలోని మాకినేని బసవపున్నయ్య స్టేడియానికి చేరుకోనున్నారు. మధ్యాహ్నం 2.10 గంటలకు స్టేడియంలో నిర్వహించే పేదలకు పట్టాభిషేకం కార్యక్రమంలో పాల్గొని అర్హులైన లబ్ధిదారులకు ఇళ్ల స్థలాల క్రమబద్ధీకరణ పట్టాలను పంపిణీ చేయనున్నారు. దశాబ్దాలుగా ప్రభుత్వ భూముల్లో నివాసముంటున్న పేద కుటుంబాలకు పూర్తి హక్కులు కల్పించే లక్ష్యంతో ప్రభుత్వం ఈ కార్యక్రమాన్ని చేపట్టింది. ముఖ్యమంత్రి పర్యటన నేపథ్యంలో స్టేడియం పరిసరాల్లో అధికారులు విస్తృత ఏర్పాట్లు చేశారు. లబ్ధిదారులు, ప్రజాప్రతినిధులు, వివిధ శాఖల అధికారులు కార్యక్రమానికి హాజరుకానున్నారు. భద్రత, వాహనాల రాకపోకలు, పార్కింగ్‌కు సంబంధించి ప్రత్యేక చర్యలు తీసుకుంటున్నారు. కార్యక్రమం ముగిసిన అనంతరం మధ్యాహ్నం 3.50 గంటలకు ముఖ్యమంత్రి తన నివాసానికి చేరుకుంటారు. సాయంత్రం 5 గంటలకు పోలవరం ప్రాజెక్టుతోపాటు రాష్ట్రంలోని ఇతర సాగునీటి ప్రాజెక్టుల పురోగతిపై సంబంధిత శాఖల ఉన్నతాధికారులతో సమీక్ష నిర్వహించనున్నారు. నిర్మాణ పనుల ప్రస్తుత పరిస్థితి, నిధుల వినియోగం, నిర్ణీత గడువులో పనులు పూర్తి చేసేందుకు తీసుకోవాల్సిన చర్యలపై అధికారులకు దిశానిర్దేశం చేయనున్నారు.