నడిరోడ్డుపై అగ్నిగోళంగా మారిన కారు

ఇబ్రహీంపట్నం: ప్రయాణిస్తున్న కారులో ఒక్కసారిగా మంటలు చెలరేగి పూర్తిగా దగ్ధమైన ఘటన ఇబ్రహీంపట్నం మండలం కొండపల్లి వద్ద ఆదివారం తెల్లవారుజామున చోటుచేసుకుంది. కంచికచర్ల వైపు వెళ్తున్న కారులో అకస్మాత్తుగా మంటలు చెలరేగాయి. మంటలను గుర్తించిన వాహనంలోని వారు వెంటనే బయటకు దిగడంతో ప్రాణాపాయం తప్పింది. కొద్దిసేపటికే మంటలు కారు మొత్తం వ్యాపించడంతో వాహనం పూర్తిగా దగ్ధమైంది. సమాచారం అందుకున్న పోలీసులు, అగ్నిమాపక సిబ్బంది ఘటనా స్థలానికి చేరుకొని మంటలను అదుపులోకి తీసుకొచ్చారు. షార్ట్‌ సర్క్యూట్‌ కారణంగానే మంటలు చెలరేగి ఉండవచ్చని ప్రాథమికంగా భావిస్తున్నారు. ఘటనలో ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు.