సీఐ మొహమ్మద్ అలీ మృతి తీరని లోటు

విజయవాడ, సెప్టెంబర్ 27: నున్న పోలీస్‌స్టేషన్ సీఐ మొహమ్మద్ అలీ ఆకస్మిక మృతిపై ప్రభుత్వ విప్, విజయవాడ సెంట్రల్ ఎమ్మెల్యే బొండా ఉమామహేశ్వరరావు తీవ్ర దిగ్భ్రాంతి వ్యక్తం చేశారు. తెలుగుదేశం పార్టీ యువ నాయకుడు బొండా సిద్ధార్థతో కలిసి ఆదివారం అలీ పార్థివ దేహాన్ని సందర్శించి పూలమాలలు వేసి నివాళులర్పించారు. అనంతరం కుటుంబ సభ్యులను పరామర్శించి ప్రగాఢ సానుభూతి తెలిపారు. విధి నిర్వహణలో నిబద్ధతతో పనిచేసిన మొహమ్మద్ అలీ మృతి పోలీసు శాఖతోపాటు ఆయన కుటుంబ సభ్యులు, బంధుమిత్రులకు తీరని లోటని పేర్కొన్నారు. ఈ విషాదాన్ని తట్టుకునే ధైర్యాన్ని ఆయన కుటుంబానికి అల్లాహ్ ప్రసాదించాలని ప్రార్థించారు. మొహమ్మద్ అలీ ఆత్మకు శాంతి చేకూరాలని ఆకాంక్షించారు.