సుందరయ్య నగర్‌కు కొత్త రోడ్ల వెలుగు

విజయవాడ, సెప్టెంబర్ 26 : ప్రజలకు మెరుగైన మౌలిక వసతులు కల్పించడమే లక్ష్యంగా విజయవాడ సెంట్రల్ నియోజకవర్గంలో అభివృద్ధి పనులు నిరంతరం కొనసాగుతున్నాయని ప్రభుత్వ విప్, ఎమ్మెల్యే బొండా ఉమామహేశ్వరరావు తెలిపారు. శనివారం 63వ డివిజన్ సుందరయ్య నగర్‌లోని రామాలయం పక్క వీధిలో నాలుగు సీసీ రోడ్ల నిర్మాణ పనులకు స్థానిక మహిళలతో కలిసి ఆయన శంకుస్థాపన చేశారు. ఈ సందర్భంగా బొండా ఉమా మాట్లాడుతూ సుందరయ్య నగర్‌లోని నాలుగు వీధుల్లో దీర్ఘకాలంగా డ్రైనేజీ సమస్య ఉందన్నారు. కొద్దిపాటి వర్షానికే మురుగునీరు ఇళ్లలోకి చేరి ప్రజలు తీవ్ర ఇబ్బందులు ఎదుర్కొంటున్న విషయాన్ని స్థానిక మహిళలు తన దృష్టికి తీసుకొచ్చారని చెప్పారు. ఇచ్చిన హామీ మేరకు డ్రైనేజీ సమస్య పరిష్కారానికి చర్యలు చేపట్టి, ఇప్పుడు సీసీ రోడ్ల నిర్మాణ పనులు ప్రారంభించినట్లు తెలిపారు. పనులను వేగంగా, నాణ్యతతో పూర్తి చేయాలని అధికారులను

ఆదేశించారు. ఇటీవల భారీ వర్షాలు కురిసిన సమయంలో నియోజకవర్గంలోని పలు ప్రాంతాల్లో పర్యటించి రోడ్లు, డ్రైనేజీలు, కల్వర్టుల పరిస్థితిని పరిశీలించామని చెప్పారు. గుర్తించిన సమస్యలను అధికారుల దృష్టికి తీసుకెళ్లి తక్షణ చర్యలు చేపట్టేలా కృషి చేసినట్లు వివరించారు. గత 26 నెలల్లో సెంట్రల్ నియోజకవర్గంలో సుమారు రూ.6.50 కోట్లతో రోడ్లు, కల్వర్టులు, తాగునీటి సదుపాయాలు, కమ్యూనిటీ హాళ్లు, ప్రాథమిక ఆరోగ్య కేంద్రాలు, పాఠశాల భవనాలకు సంబంధించిన అభివృద్ధి పనులు చేపట్టినట్లు తెలిపారు. పదవులు, హోదాల కంటే ప్రజలకు సేవ చేయడమే ముఖ్యమని, రాబోయే రోజుల్లో మరింత అంకితభావంతో పనిచేస్తామని స్పష్టం చేశారు. కార్యక్రమంలో మాజీ కార్పొరేటర్ మోదుగుల తిరుపతమ్మ, డివిజన్ అధ్యక్షుడు లబ్బా వైకుంఠం, కోలా శ్రీను, మోత్కూరి కాసిం, షేక్ మెహర్, దుర్గాసి రాము, భీమన ఆంజనేయులు, మోదుగుల గణేష్ తదితరులు పాల్గొన్నారు.