వేలాదిమందితో ముఖ్యమంత్రి చంద్రబాబుకు ఘన స్వాగతం

విజయవాడ, సెప్టెంబర్‌ 29: ముఖ్యమంత్రి నారా చంద్రబాబు నాయుడు విజయవాడ పర్యటన నేపథ్యంలో ఆయనకు వేలాది మందితో ఘన స్వాగతం పలికేందుకు ఏర్పాట్లు చేస్తున్నారు. కెనాల్‌ రోడ్డులోని వినాయకుడి గుడి ప్రాంతంలో చేపట్టిన స్వాగత, భద్రతా ఏర్పాట్లను మంగళవారం సాయంత్రం నగర పోలీస్‌ కమిషనర్‌ ఎస్‌వీ రాజశేఖర్‌బాబు, విజయవాడ పశ్చిమ నియోజకవర్గ తెలుగుదేశం పార్టీ ఇన్‌ఛార్జి బుద్ధా వెంకన్న పరిశీలించారు. ముఖ్యమంత్రి

పర్యటన మార్గంలో ట్రాఫిక్‌ నియంత్రణ, ప్రజలకు ఇబ్బందులు కలగకుండా తీసుకోవాల్సిన చర్యలు, పటిష్ఠ బందోబస్తు తదితర అంశాలపై పోలీసు అధికారులకు కమిషనర్‌ సూచనలు చేశారు. ముఖ్యమంత్రికి అపూర్వ స్వాగతం పలికేందుకు అవసరమైన ఏర్పాట్లపై బుద్ధా వెంకన్న పార్టీ నాయకులతో చర్చించారు. కార్యక్రమంలో విజయవాడ వన్‌టౌన్‌ సీఐ గుణరామ్‌తోపాటు పోలీసు అధికారులు, తెలుగుదేశం పార్టీ నాయకులు పాల్గొన్నారు.