తుఫాన్ వేళ రంగంలోకి ఎమ్మెల్యే వెనిగండ్ల రాము!

గుడివాడ, అక్టోబర్ 28 : 'అర్నాబ్' తుఫాన్ ప్రభావంతో గుడివాడ పట్టణం, పరిసర ప్రాంతాల్లో భారీ వర్షాలు, ఈదురుగాలులు కొనసాగుతున్న నేపథ్యంలో స్థానిక ఎమ్మెల్యే వెనిగండ్ల రాము క్షేత్రస్థాయిలో పర్యటించి పరిస్థితులను సమీక్షించారు. స్వయంగా కారు నడుపుకుంటూ పట్టణంలోని పలు ప్రాంతాల్లో పర్యటించిన ఆయన రోడ్లపై కూలిన చెట్ల తొలగింపు, విద్యుత్ పునరుద్ధరణ పనులను పరిశీలించారు. ప్రజలకు ఎలాంటి ఇబ్బందులు తలెత్తకుండా అధికార యంత్రాంగం అప్రమత్తంగా పనిచేయాలని సూచించారు. తొలుత నందివాడ రూరల్, గుడివాడ పట్టణం, గుడ్లవల్లేరు మండలాల కూటమి నాయకులతో టెలిఫోన్ గ్రూప్ కాల్ నిర్వహించి పరిస్థితులను అడిగి తెలుసుకున్నారు. గ్రామాలు, పట్టణాల్లో నెలకొన్న సమస్యలు, విద్యుత్ అంతరాయాలు, రాకపోకలకు ఎదురవుతున్న ఇబ్బందులపై ఆరా తీశారు. ప్రజలతో నిరంతరం అందుబాటులో ఉంటూ సమస్యలను ఎప్పటికప్పుడు తన దృష్టికి తీసుకురావాలని పార్టీ నాయకులకు సూచించారు. అనంతరం గుడివాడ పట్టణంలోని ఏలూరు రోడ్డు, బస్టాండ్, మార్కెట్ సెంటర్, జైన్ స్ట్రీట్, ఆర్డీవో కార్యాలయ రోడ్డు, కొత్తపేట తదితర ప్రాంతాల్లో పర్యటించారు. రోడ్లపై కూలిన చెట్లను తొలగిస్తున్న మున్సిపల్ సిబ్బంది పనితీరును పరిశీలించారు. లింగవరం విద్యుత్ సబ్‌స్టేషన్ వద్ద ప్రధాన విద్యుత్ లైన్ మరమ్మతు పనులను సమీక్షించి పునరుద్ధరణ ప్రక్రియను వేగవంతం చేయాలని సూచించారు. ఈ సందర్భంగా ఎమ్మెల్యే వెనిగండ్ల రాము మాట్లాడుతూ గుడివాడ పట్టణంలో కూలిన చెట్లలో 80 శాతానికి పైగా ఇప్పటికే తొలగించినట్లు తెలిపారు. మున్సిపల్ యంత్రాంగం వేగంగా స్పందిస్తూ రహదారులను అందుబాటులోకి తీసుకువస్తోందన్నారు. విద్యుత్ సరఫరాను పునరుద్ధరించేందుకు సంబంధిత సిబ్బంది నిరంతరం శ్రమిస్తున్నారని చెప్పారు. అత్యవసరమైతే తప్ప ప్రజలు ఇళ్ల నుంచి బయటకు రావద్దని, ముఖ్యంగా బలమైన ఈదురుగాలులు వీస్తున్న సమయంలో ద్విచక్ర వాహనాలపై ప్రయాణాలు చేయవద్దని ఎమ్మెల్యే విజ్ఞప్తి చేశారు. సాయంత్రం వరకు ప్రతికూల వాతావరణ పరిస్థితులు కొనసాగే అవకాశం ఉన్నందున అప్రమత్తంగా ఉండాలని సూచించారు. గ్రామీణ ప్రాంతాల్లోనూ కూటమి నాయకులు ప్రజలకు అందుబాటులో ఉండాలని, చెట్లు కూలడం, విద్యుత్ అంతరాయాలు వంటి సమస్యలు తలెత్తితే వెంటనే అధికారుల దృష్టికి లేదా తన దృష్టికి తీసుకురావాలని ఎమ్మెల్యే స్పష్టం చేశారు. ప్రజల భద్రతకు అత్యధిక ప్రాధాన్యం ఇస్తున్నామని, అవసరమైన చోట తక్షణ సహాయక చర్యలు చేపడతామని వెనిగండ్ల రాము తెలిపారు.