తుఫాన్ వర్షాల్లోనూ రోడ్లపైనే ట్రాఫిక్ పోలీసులు!

విజయవాడ, అక్టోబర్ 28 : 'అర్నబ్' తుఫాన్ ప్రభావంతో విజయవాడ నగరంలో కురుస్తున్న వర్షాల నేపథ్యంలో ట్రాఫిక్ పోలీసులు, విజయవాడ నగరపాలక సంస్థ (వీఎంసీ) సిబ్బంది అప్రమత్తమయ్యారు. భారీ వర్షాల కారణంగా ప్రధాన రహదారులు, కూడళ్లలో నీరు నిల్వ ఉండకుండా, వాహనాల రాకపోకలకు అంతరాయం కలగకుండా క్షేత్రస్థాయిలో ప్రత్యేక చర్యలు చేపట్టారు. వర్షాలను సైతం లెక్కచేయకుండా ట్రాఫిక్ పోలీసులు విధులు నిర్వహిస్తూ వాహనదారులకు ఇబ్బందులు తలెత్తకుండా చర్యలు తీసుకుంటున్నారు. ఎన్టీఆర్ జిల్లా పోలీస్ కమిషనర్ ఎస్.వి. రాజశేఖర్ బాబు ఆదేశాల మేరకు ట్రాఫిక్ డీసీపీ షరీన్ బేగం ఆధ్వర్యంలో, ట్రాఫిక్ ఏసీపీల పర్యవేక్షణలో నగరవ్యాప్తంగా ప్రత్యేక నిఘా ఏర్పాటు చేశారు. వర్షపు నీరు నిలిచే ప్రాంతాలను గుర్తించి వీఎంసీ అధికారులతో సమన్వయం చేసుకుంటూ నీటి నిల్వలను తొలగించేందుకు తక్షణ చర్యలు చేపడుతున్నారు. ప్రధాన కూడళ్లు, రద్దీ రహదారుల్లో ట్రాఫిక్ పోలీసులు నిరంతరం పర్యవేక్షిస్తూ వాహనాల రాకపోకలను క్రమబద్ధీకరిస్తున్నారు. నీరు నిలిచిన ప్రాంతాల్లో వాహనదారులు ఇబ్బందులు పడకుండా అవసరమైన సూచనలు అందిస్తున్నారు. ట్రాఫిక్‌కు అంతరాయం ఏర్పడే పరిస్థితులను గుర్తించి వీఎంసీ సిబ్బందితో కలిసి సమస్యల పరిష్కారానికి చర్యలు తీసుకుంటున్నారు. ఈ సందర్భంగా ట్రాఫిక్ డీసీపీ షరీన్ బేగం వాహనదారులకు పలు సూచనలు చేశారు. వర్షాల సమయంలో ద్విచక్ర వాహనదారులు, ఇతర వాహనచోదకులు వేగాన్ని తగ్గించి జాగ్రత్తగా ప్రయాణించాలని కోరారు. రహదారులపై నీరు నిలిచిన ప్రదేశాల్లో అప్రమత్తంగా ఉండాలని, ట్రాఫిక్ పోలీసుల సూచనలను తప్పనిసరిగా పాటించాలని సూచించారు. ప్రజల భద్రతే ప్రధాన లక్ష్యంగా ట్రాఫిక్ పోలీసులు, వీఎంసీ సిబ్బంది సమన్వయంతో పనిచేస్తున్నారని, వర్షాలు కొనసాగుతున్న నేపథ్యంలో వాహనదారులు అనవసర ప్రయాణాలను నివారించి సురక్షితంగా ఉండాలని అధికారులు విజ్ఞప్తి చేశారు.