ఆనం సమక్షంలో అట్టహాసంగా దీక్షాంత్ పరేడ్

నెల్లూరు, సెప్టెంబరు 26: వెంకటాచలం మండలం చెముడుగుంటలోని జిల్లా పోలీస్ శిక్షణ కేంద్రంలో శుక్రవారం ఎస్‌సీటీపీసీల పాసింగ్‌ అవుట్‌ పరేడ్‌ ఘనంగా నిర్వహించారు. ఈ దీక్షాంత్‌ పరేడ్‌కు రాష్ట్ర దేవాదాయ శాఖ మంత్రి ఆనం రామనారాయణరెడ్డి ముఖ్య అతిథిగా హాజరై పోలీసుల గౌరవ వందనం స్వీకరించారు. జిల్లా ఎస్పీ డాక్టర్‌ అజితా వేజెండ్ల మంత్రి ఆనంకు ఘన స్వాగతం పలికారు. శిక్షణ పూర్తిచేసుకున్న

176 మంది పోలీస్‌ కానిస్టేబుళ్లు క్రమశిక్షణతో నిర్వహించిన కవాతు విశేషంగా ఆకట్టుకుంది. వారి తల్లిదండ్రులు, కుటుంబ సభ్యులు, అతిథుల కరతాళ ధ్వనుల మధ్య పరేడ్‌ ఉత్సాహంగా సాగింది. శిక్షణ కాలంలో అత్యుత్తమ ప్రతిభ కనబరిచిన కానిస్టేబుల్‌ అభ్యర్థులకు మంత్రి ఆనం రామనారాయణరెడ్డి, జిల్లా ఎస్పీ డాక్టర్‌ అజితా వేజెండ్ల, అదనపు ఎస్పీలు దీక్ష, సౌజన్య జ్ఞాపికలు అందించి అభినందించారు.