అనుమతి లేకుండా ధర్నా చేస్తే చర్యలు

విజయవాడ, సెప్టెంబర్ 26 : గ్రామ, వార్డు సచివాలయ ఉద్యోగులు ఈ నెల 27న నిర్వహించ తలపెట్టిన ధర్నా, ర్యాలీకి అనుమతి నిరాకరించినట్లు విజయవాడ పోలీసులు తెలిపారు. నగరంలో ప్రస్తుతం నిషేధాజ్ఞలు అమల్లో ఉండటం, వరద పరిస్థితులు, వినాయక నిమజ్జనాలు, ట్రాఫిక్ సమస్యలను దృష్టిలో ఉంచుకుని అనుమతి ఇవ్వలేదని డీసీపీ గుణ్ణం రామకృష్ణ శనివారం వెల్లడించారు. పోలీసుల ముందస్తు అనుమతి లేకుండా ధర్నాలు, ర్యాలీలు నిర్వహిస్తే చట్టప్రకారం చర్యలు తీసుకుంటామని హెచ్చరించారు. ప్రజలకు, వాహనదారులకు ఇబ్బందులు కలిగించే కార్యక్రమాలు చేపట్టవద్దని సూచించారు. పోలీసు నిబంధనలను పాటిస్తూ శాంతిభద్రతల పరిరక్షణకు సహకరించాలని సచివాలయ ఉద్యోగులకు విజ్ఞప్తి చేశారు.