అవగాహన పాఠంతో బయటపడ్డ బాలికపై వేధింపులు

నాగ్‌పూర్‌: మంచి స్పర్శ, చెడు స్పర్శ గురించి పాఠశాలలో చెప్పిన అవగాహన పాఠం ఓ బాలికపై జరుగుతున్న లైంగిక వేధింపులను వెలుగులోకి తెచ్చింది. మహారాష్ట్రలోని నాగ్‌పూర్‌లో ఏడేళ్ల బాలిక తనకు ఎదురవుతున్న వేధింపులను ఉపాధ్యాయురాలికి చెప్పడంతో విషయం బయటపడింది. బాలిక ఇంట్లో అద్దెకు ఉంటున్న రాజేష్‌ అనే వ్యక్తి చాక్లెట్ల ఆశ చూపి అసభ్యంగా తాకుతూ, బెదిరిస్తున్నాడని ఆరోపణలు వచ్చాయి. పాఠశాలలో స్పర్శల మధ్య తేడాను వివరించిన అనంతరం బాలిక ఈ విషయాన్ని ఉపాధ్యాయురాలి దృష్టికి తీసుకెళ్లింది. విషయం తెలుసుకున్న బాలిక తల్లి పోలీసులకు ఫిర్యాదు చేశారు. దీంతో పోలీసులు కేసు నమోదు చేసి నిందితుడిని అరెస్టు చేశారు. చిన్నారులు తమకు ఎదురయ్యే అనుచిత ప్రవర్తనను గుర్తించి, నమ్మకమైన పెద్దలకు చెప్పేందుకు పాఠశాలల్లో అందించే అవగాహన ఎంత అవసరమో ఈ ఘటన చాటుతోంది.