బీసీలకు రాజకీయంగా పెద్దపీట వేసింది టీడీపీనే

విజయవాడ, అక్టోబర్ 10: బీసీలకు రాజకీయంగా గుర్తింపు, గౌరవం, ఉన్నత పదవులు కల్పించిన ఘనత తెలుగుదేశం పార్టీకే దక్కుతుందని టీడీపీ నాయకుడు నాగుల్ మీరా అన్నారు. రాష్ట్ర జనాభాలో సగానికి పైగా ఉన్న బీసీలు మొదటి నుంచి టీడీపీకి అండగా నిలుస్తున్నారని పేర్కొన్నారు. స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించేందుకు టీడీపీ కట్టుబడి ఉందని స్పష్టం చేశారు. చట్టపరమైన రిజర్వేషన్ల అంశంతో పాటు పార్టీ పరంగా బీసీలకు 34 శాతం ప్రాతినిధ్యం కల్పించాలనే నిర్ణయం వారి రాజకీయ సాధికారతకు దోహదపడుతుందన్నారు. బీసీలకు రిజర్వేషన్లు అమలు కాకుండా వైసీపీ న్యాయపరమైన అడ్డంకులు సృష్టించిందని ఆరోపించారు. గతంలో కాంగ్రెస్ బీసీలను ఓటు బ్యాంకుగానే చూసిందని విమర్శించారు. దివంగత ఎన్టీఆర్ హయాంలో బీసీలకు రాజకీయ అవకాశాలు కల్పించారని, ప్రస్తుతం ముఖ్యమంత్రి చంద్రబాబు నాయుడు కూడా వారికి సముచిత ప్రాధాన్యం ఇస్తున్నారని తెలిపారు. వైసీపీ పాలనలో బీసీ కార్పొరేషన్లను నిర్వీర్యం చేసి, నిధులను సక్రమంగా వినియోగించలేదని ఆరోపించారు. ఎస్సీ, ఎస్టీ, బీసీ వర్గాలకు జరిగిన అన్యాయానికి 2024 ఎన్నికల్లో ప్రజలు తగిన గుణపాఠం చెప్పారన్నారు. బీసీల హక్కుల పరిరక్షణ, రాజకీయ ప్రాతినిధ్యం పెంపునకు టీడీపీ నిరంతరం కృషి చేస్తుందని నాగుల్ మీరా పేర్కొన్నారు.