బీసీల హక్కుల కోసం సుప్రీంకోర్టు బాట

విజయవాడ, అక్టోబరు 1: స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించేందుకు కూటమి ప్రభుత్వం కట్టుబడి ఉందని మంత్రి కొల్లు రవీంద్ర స్పష్టం చేశారు. రిజర్వేషన్లకు సంబంధించిన జీవోలను హైకోర్టు కొట్టివేయడంపై స్పందించిన ఆయన, తీర్పును సవాల్‌ చేస్తూ సుప్రీంకోర్టును ఆశ్రయిస్తామని వెల్లడించారు. బీసీలకు న్యాయం జరిగే వరకు తమ ప్రభుత్వం న్యాయపోరాటం కొనసాగిస్తుందని పేర్కొన్నారు. గతంలో అమల్లో ఉన్న 34 శాతం బీసీ రిజర్వేషన్లను వైసీపీ ప్రభుత్వం 24 శాతానికి తగ్గించి బీసీలకు అన్యాయం చేసిందని ఆరోపించారు. శాసనసభలో 34 శాతం రిజర్వేషన్లకు సంబంధించిన తీర్మానాన్ని ప్రవేశపెట్టకముందే వైసీపీ నేతలు న్యాయస్థానాల్లో కేసులు వేసి అడ్డుకునేందుకు ప్రయత్నించారని విమర్శించారు. బీసీల రాజకీయ ప్రాతినిధ్యాన్ని కాపాడేందుకు కూటమి ప్రభుత్వం అన్ని చర్యలు తీసుకుంటుందని మంత్రి కొల్లు రవీంద్ర తెలిపారు.