85వ డివిజన్ అభివృద్ధే ధ్యేయం

పాయకాపురం, అక్టోబర్ 28: డివిజన్ అభివృద్ధే ధ్యేయంగా పనిచేస్తామని 85వ డివిజన్ టీడీపీ కార్పొరేటర్ అభ్యర్థి వట్టే వెంకటేశ్వరరావు అన్నారు. అర్నాబ్ తుఫాను ప్రభావంతో కురుస్తున్న వర్షాల నేపథ్యంలో ప్రజలకు ఇబ్బందులు తలెత్తకుండా డ్రైనేజీల శుభ్రత పనులు చేపట్టారు. రాష్ట్ర ప్రభుత్వ విప్, విజయవాడ సెంట్రల్ ఎమ్మెల్యే బోండా ఉమామహేశ్వరరావు ఆదేశాల మేరకు బుధవారం ఉదయం 7 గంటల నుంచి డివిజన్ పరిధిలో వట్టే వెంకటేశ్వరరావు పర్యటించారు. విజయవాడ నగరపాలక సంస్థ సిబ్బందితో సమన్వయం చేసుకుంటూ వర్షపు నీరు నిల్వ ఉన్న ప్రాంతాలను పరిశీలించారు. డ్రైనేజీల్లో పేరుకుపోయిన చెత్తాచెదారం, పూడిక, ఇతర అడ్డంకులను తొలగించి వర్షపు నీరు సజావుగా పారేలా చర్యలు చేపట్టారు. నివాస ప్రాంతాలు, రహదారులపై నీరు నిల్వ ఉండకుండా ప్రత్యేక దృష్టి సారించారు. ఈ సందర్భంగా వట్టే వెంకటేశ్వరరావు మాట్లాడుతూ ప్రజల సమస్యల పరిష్కారానికి నిరంతరం కృషి చేస్తామని తెలిపారు. వర్షాల సమయంలో ముంపు సమస్యలు తలెత్తకుండా ముందస్తు చర్యలకు ప్రాధాన్యత ఇస్తున్నామన్నారు. డివిజన్‌లో పారిశుద్ధ్యం, డ్రైనేజీ వ్యవస్థ మెరుగుదలతో పాటు మౌలిక సదుపాయాల కల్పనకు కృషి చేస్తామని పేర్కొన్నారు. ప్రజలకు ఎల్లప్పుడూ అందుబాటులో ఉంటూ డివిజన్ అభివృద్ధికి పాటుపడతామని తెలిపారు. ఈ కార్యక్రమంలో కూటమి నాయకులు, కార్యకర్తలు తదితరులు పాల్గొన్నారు.