అల్లిక నాదే... నీ ఓటు నాకే!

విజయవాడ సెంట్రల్, అక్టోబర్ 28: విజయవాడ సెంట్రల్ నియోజకవర్గంలోని 73వ డివిజన్‌లో ఎన్డీఏ కూటమి బలపరిచిన తెలుగుదేశం పార్టీ కార్పొరేటర్ అభ్యర్థి ఎరుబోతు సుజాత బుధవారం ఇంటింటి ఎన్నికల ప్రచారం నిర్వహించారు. రాష్ట్ర ప్రభుత్వ విప్, సెంట్రల్ ఎమ్మెల్యే బోండా ఉమామహేశ్వరరావు ఆదేశాల మేరకు మేదరు బజార్ ప్రాంతంలో కూటమి నాయకులతో కలిసి పర్యటించారు. ఓటరు జాబితాను పరిశీలిస్తూ ఇంటింటికీ వెళ్లి స్థానికులను ఆప్యాయంగా పలకరించారు. ఈ సందర్భంగా సంప్రదాయ కులవృత్తులపై ఆధారపడి జీవనం సాగిస్తున్న కార్మికులతో సుజాత ముచ్చటించారు. వారి జీవనోపాధి, వృత్తిపరమైన సమస్యలను అడిగి తెలుసుకున్నారు. కులవృత్తులు సమాజానికి ఎంతో అవసరమని, సంప్రదాయ వృత్తులను ప్రతి ఒక్కరూ గౌరవించాలని పేర్కొన్నారు. మేదరు వృత్తిదారుల పనితీరును ఆసక్తిగా పరిశీలించిన ఆమె, వారి నైపుణ్యాన్ని అభినందించారు. కూటమి ప్రభుత్వం అమలు చేస్తున్న సంక్షేమ పథకాలు, అభివృద్ధి కార్యక్రమాలను ప్రజలకు వివరించారు. డివిజన్‌లో మౌలిక వసతుల మెరుగుదల, పారిశుద్ధ్యం, డ్రైనేజీ సమస్యల పరిష్కారానికి ప్రాధాన్యత ఇస్తామని సుజాత తెలిపారు. ప్రజలకు నిరంతరం అందుబాటులో ఉంటూ వారి సమస్యల పరిష్కారానికి కృషి చేస్తానన్నారు. రానున్న నగరపాలక సంస్థ ఎన్నికల్లో తనకు సైకిల్ గుర్తుపై ఓటు వేసి గెలిపించాలని, కూటమి మేయర్ అభ్యర్థి వంగవీటి రాధాకృష్ణకు గాజు గ్లాసు గుర్తుపై ఓటు వేసి విజయాన్ని అందించాలని ఓటర్లను అభ్యర్థించారు. ఈ ప్రచార కార్యక్రమంలో కూటమి నాయకులు, కార్యకర్తలు తదితరులు పాల్గొన్నారు.