మాదక ద్రవ్యాలపై చైతన్యానికి 3 వేల కిలోమీటర్ల సైకిల్‌ యాత్ర

అవనిగడ్డ, సెప్టెంబర్‌ 28: మాదక ద్రవ్యాల వినియోగంతో కలిగే దుష్పరిణామాలపై ప్రజలు, విద్యార్థులను చైతన్యపరిచేందుకు కళారత్న పురస్కార గ్రహీత ఇందుకూరి విజయలక్ష్మి మూడు వేల కిలోమీటర్ల సైకిల్‌ యాత్రకు సిద్ధమయ్యారు. ఏలూరు జిల్లా ఉంగుటూరు మండలం నారాయణపురానికి చెందిన ఆమె సోమవారం అవనిగడ్డలో ఎమ్మెల్యే మండలి బుద్ధప్రసాద్‌ను మర్యాదపూర్వకంగా కలిశారు. ఈ సందర్భంగా విజయలక్ష్మి మాట్లాడుతూ అక్టోబర్‌ 22న భీమవరంలోని అల్లూరి సీతారామరాజు విగ్రహం వద్ద నుంచి దేశ రాజధాని దిల్లీ వరకు సైకిల్‌ యాత్ర చేపట్టనున్నట్లు తెలిపారు. దాదాపు మూడు వేల కిలోమీటర్ల ప్రయాణంలో లక్ష మందికి పైగా విద్యార్థులను కలిసి మాదక ద్రవ్యాల వల్ల కలిగే అనర్థాలపై అవగాహన కల్పించనున్నట్లు వివరించారు. 2017లో అధికార భాషా సంఘం ఛైర్మన్‌గా ఉన్న మండలి బుద్ధప్రసాద్‌ స్ఫూర్తితో స్వచ్ఛ భారత్‌పై ప్రజలను చైతన్యపరిచేందుకు ఇచ్చాపురం నుంచి తడ వరకు రెండు వేల కిలోమీటర్ల సైకిల్‌ యాత్ర నిర్వహించినట్లు గుర్తుచేశారు. సమాజ చైతన్యం కోసం 62 ఏళ్ల వయసులోనూ సాహసోపేతమైన యాత్రకు సిద్ధమైన విజయలక్ష్మిని ఎమ్మెల్యే బుద్ధప్రసాద్‌ అభినందించి సత్కరించారు. ఆమె సంకల్పం యువతకు స్ఫూర్తిదాయకమని కొనియాడారు.