నవంబర్ 23న మేయర్లు, ఛైర్‌పర్సన్ల ప్రమాణ స్వీకారం!

విజయవాడ, నవంబర్ 5

: ఆంధ్రప్రదేశ్‌లో ఇటీవల జరిగిన మున్సిపల్ ఎన్నికల్లో విజయం సాధించిన మేయర్లు, ఛైర్‌పర్సన్ల ప్రమాణ స్వీకారానికి ముహూర్తం ఖరారైంది. ఈ నెల 23న నూతనంగా ఎన్నికైన ప్రజాప్రతినిధులు బాధ్యతలు స్వీకరించనున్నారు. రాష్ట్రవ్యాప్తంగా 13 నగరపాలక సంస్థలు, 77 మున్సిపాలిటీలు, 10 నగర పంచాయతీల్లో కొత్త పాలకవర్గాల ఏర్పాటు ప్రక్రియకు రాష్ట్ర ఎన్నికల సంఘం చర్యలు చేపట్టింది. మరోవైపు డిప్యూటీ మేయర్లు, వైస్ ఛైర్‌పర్సన్ల ఎన్నికల తేదీలను కూడా రాష్ట్ర ఎన్నికల సంఘం ఖరారు చేసింది. నవంబర్ 23న ఉదయం 11 గంటలకు ప్రత్యేక సమావేశాలు నిర్వహించి ఈ పదవులకు ఎన్నికలు చేపట్టాలని ఆదేశించింది. ఇందుకు సంబంధించి ఈ నెల 18న జిల్లా కలెక్టర్లు లేదా జాయింట్ కలెక్టర్లు ప్రత్యేక సమావేశాల నోటీసులు జారీ చేయనున్నారు. గతంలో మేయర్లు, ఛైర్‌పర్సన్లను పరోక్ష పద్ధతిలో ఎన్నుకునే విధానం ఉండగా, తాజా ఎన్నికల్లో ప్రజలే నేరుగా తమ నగర సారథులను ఎన్నుకున్నారు. అయితే డిప్యూటీ మేయర్లు, వైస్ ఛైర్‌పర్సన్ల ఎంపిక మాత్రం పరోక్ష ఎన్నికల విధానంలోనే జరగనుంది. ఇందుకు సంబంధించిన నిబంధనలను ప్రభుత్వం ఇప్పటికే రూపొందించింది. విజయవాడ నగరపాలక సంస్థ డిప్యూటీ మేయర్ ఎన్నికకు కూడా ఇదే షెడ్యూల్ వర్తించనుంది. ఎన్టీఆర్ జిల్లా కలెక్టర్ లేదా జాయింట్ కలెక్టర్ ఆధ్వర్యంలో ఎన్నిక నిర్వహించనున్నారు. దీంతో మేయర్ పీఠాన్ని దక్కించుకున్న కూటమిలో డిప్యూటీ మేయర్ పదవి ఎవరికి దక్కుతుందనే అంశంపై రాజకీయ వర్గాల్లో ఆసక్తి నెలకొంది. కొత్త పాలకవర్గాల ఏర్పాటు నేపథ్యంలో నగరాభివృద్ధి, మౌలిక సదుపాయాల కల్పనపై ప్రజలు ఆశలు పెట్టుకున్నారు.