విశాఖ స్టీల్ ప్లాంట్‌లో మరో ప్రమాదం!

విశాఖపట్నం, నవంబర్: విశాఖ స్టీల్ ప్లాంట్‌లో మరో ప్రమాదం చోటుచేసుకుంది. బుధవారం అర్ధరాత్రి దాటిన తర్వాత విధులు నిర్వహిస్తున్న కాంట్రాక్టు కార్మికుడు దుంబరి దేముడుపై వేడి ద్రవం పడటంతో తీవ్రంగా గాయపడ్డారు. విజయనగరం జిల్లా కొండగంగుపూడికి చెందిన దేముడు (37) శరీరంపై సుమారు 90 శాతం కాలిన గాయాలైనట్లు సమాచారం. ప్రమాదం జరిగిన వెంటనే తోటి కార్మికులు స్పందించి దేముడును విశాఖపట్నంలోని ఓ కార్పొరేట్ ఆసుపత్రికి తరలించారు. ప్రస్తుతం ఆయనకు వైద్యులు చికిత్స అందిస్తుండగా, ఆరోగ్య పరిస్థితి అత్యంత విషమంగా ఉన్నట్లు తెలుస్తోంది. స్టీల్ ప్లాంట్‌లో వరుసగా చోటుచేసుకుంటున్న ప్రమాదాలు కార్మికుల్లో ఆందోళన కలిగిస్తున్నాయి. ముఖ్యంగా ప్రమాదకర విభాగాల్లో పనిచేస్తున్న కాంట్రాక్టు కార్మికుల భద్రతకు తీసుకుంటున్న చర్యలపై ప్రశ్నలు తలెత్తుతున్నాయి. తాజా ప్రమాదానికి గల కారణాలు, ఘటన జరిగిన విభాగం, భద్రతా చర్యల అమలుపై యాజమాన్యం నుంచి అధికారిక వివరణ రావాల్సి ఉంది.