హెల్మెట్‌ లేకపోతే.. ప్రాణానికే ముప్పు

ఇబ్రహీంపట్నం, అక్టోబర్‌ 2: ద్విచక్ర వాహనదారులు తప్పనిసరిగా హెల్మెట్‌ ధరించి సురక్షితంగా ప్రయాణించాలని ఇబ్రహీంపట్నం ట్రాఫిక్‌ సీఐ కె.కృష్ణ సూచించారు. ఎన్టీఆర్‌ జిల్లా ఇబ్రహీంపట్నం రింగ్‌ సెంటర్‌లో ట్రాఫిక్‌ పోలీసులు వాహనదారులకు హెల్మెట్‌ ప్రాధాన్యం, రోడ్డు భద్రతా నిబంధనలపై అవగాహన కల్పించారు. హెల్మెట్‌ ధరించకుండా వాహనాలు నడిపిన వారికి కౌన్సెలింగ్‌ ఇచ్చారు. హెల్మెట్‌ లేకుండా ప్రయాణిస్తే చలానాలు విధించడమే కాకుండా, రోడ్డు ప్రమాదాలు జరిగినప్పుడు తీవ్ర గాయాలు, ప్రాణనష్టం సంభవించే ప్రమాదముందని హెచ్చరించారు. చలానాలు విధించడం తమ ప్రధాన ఉద్దేశం కాదని, వాహనదారుల ప్రాణాలను కాపాడటమే లక్ష్యమని సీఐ కృష్ణ స్పష్టం చేశారు. ప్రతి వాహనదారుడు ట్రాఫిక్‌ నిబంధనలు పాటిస్తూ హెల్మెట్‌ ధరించిన తర్వాతే రోడ్డెక్కాలని కోరారు.