సంక్షేమ పథకాలే కూటమి పాలనకు నిదర్శనం

విజయవాడ, అక్టోబర్‌ 18: ప్రజలకు ఇచ్చిన ఎన్నికల హామీలను అమలు చేస్తూ సంక్షేమం, అభివృద్ధే లక్ష్యంగా కూటమి ప్రభుత్వం పనిచేస్తోందని ప్రభుత్వ విప్‌, సెంట్రల్‌ ఎమ్మెల్యే బొండా ఉమామహేశ్వరరావు అన్నారు. విజయవాడ నగరపాలక సంస్థ ఎన్నికల్లో కూటమి అభ్యర్థులకు మద్దతు తెలపాలని కోరారు. ఆదివారం సాయంత్రం 74వ డివిజన్‌ న్యూ రాజరాజేశ్వరిపేట కనకదుర్గమ్మ ఆలయం వద్ద నుంచి కూటమి బలపరిచిన అభ్యర్థి గోపి సాయికుమార్‌కు మద్దతుగా నిర్వహించిన ప్రచారంలో ఆయన పాల్గొన్నారు. ఈ సందర్భంగా బొండా ఉమా మాట్లాడుతూ ముఖ్యమంత్రి నారా చంద్రబాబు నాయుడు నాయకత్వంలో సంక్షేమ పథకాలను ప్రజలకు చేరువ చేస్తున్నామని తెలిపారు. వృద్ధాప్య పింఛనును రూ.3 వేల నుంచి రూ.4 వేలకు, దివ్యాంగుల పింఛనును రూ.6 వేలకు పెంచామని చెప్పారు. మహిళలకు ఉచిత బస్సు ప్రయాణం, ‘తల్లికి వందనం’ వంటి పథకాలతో అర్హులైన కుటుంబాలకు ప్రయోజనం చేకూరుస్తున్నామని పేర్కొన్నారు. పేదల సొంతింటి కలను సాకారం చేసేందుకు అర్హులకు ఇళ్ల పట్టాల పంపిణీతోపాటు రిజిస్ట్రేషన్‌ ప్రక్రియ చేపడుతున్నామని తెలిపారు. స్థానిక సమస్యల పరిష్కారం, మౌలిక సదుపాయాల అభివృద్ధికి కృషి చేసే అభ్యర్థులను ఎన్నుకోవాలని కోరారు. సెంట్రల్‌ నియోజకవర్గంలోని 29 డివిజన్లలో కూటమి అభ్యర్థులను గెలిపించాలని, 74వ డివిజన్‌లో గోపి సాయికుమార్‌కు భారీ మెజారిటీ అందించాలని విజ్ఞప్తి చేశారు. కార్యక్రమంలో కూటమి పార్టీల స్థానిక నాయకులు, కార్యకర్తలు పాల్గొన్నారు.