ఆశా వర్కర్ల సమస్యలను ప్రభుత్వం దృష్టికి తీసుకెళ్తా:ఎమ్మెల్యే బొండా ఉమా

విజయవాడ, అక్టోబరు 6: ఆశా వర్కర్లు ఎదుర్కొంటున్న సమస్యలను ప్రభుత్వం దృష్టికి తీసుకెళ్లి పరిష్కారానికి కృషి చేస్తానని ప్రభుత్వ విప్‌, విజయవాడ సెంట్రల్‌ ఎమ్మెల్యే బొండా ఉమామహేశ్వరరావు హామీ ఇచ్చారు. మంగళవారం సింగ్‌నగర్‌లోని ఎమ్మెల్యే కార్యాలయంలో ఆశా వర్కర్లు ఆయనను కలిసి తమ సమస్యలను వివరించి వినతిపత్రం అందజేశారు. కనీస వేతనం, ఉద్యోగ భద్రతతోపాటు అన్ని రకాల సెలవులు, ప్రయాణ–దినసరి భత్యాలు, బీమా సౌకర్యం కల్పించాలని కోరారు. పెరుగుతున్న జనాభాకు అనుగుణంగా ఆశా పోస్టుల సంఖ్యను పెంచి, ప్రస్తుతం ఉన్న ఖాళీలను వెంటనే భర్తీ

చేయాలని విజ్ఞప్తి చేశారు. ప్రజలకు ప్రాథమిక ఆరోగ్య సేవలు అందించేందుకు నిరంతరం పనిచేస్తున్న తమ సమస్యలను ప్రభుత్వం సానుకూలంగా పరిశీలించాలని అభ్యర్థించారు. వినతిపత్రాన్ని స్వీకరించిన బొండా ఉమా మాట్లాడుతూ, గ్రామీణ, పట్టణ పేద కుటుంబాలకు ఆరోగ్య సేవలను చేరవేయడంలో ఆశా వర్కర్లు కీలక పాత్ర పోషిస్తున్నారని పేర్కొన్నారు. వారి సమస్యలను అసెంబ్లీలో ప్రస్తావించడంతోపాటు సంబంధిత శాఖ మంత్రి దృష్టికి తీసుకెళ్తానని తెలిపారు. అవసరమైన సౌకర్యాల కల్పనపై ప్రభుత్వం నుంచి సానుకూల నిర్ణయం వచ్చేలా తన వంతు కృషి చేస్తానని చెప్పారు.