గుడ్లవల్లేరులో రోడ్లకు రూ.74 లక్షల బూస్ట్

గుడ్లవల్లేరు, ఆగస్టు 28: గుడివాడ నియోజకవర్గంలో గ్రామీణ రహదారుల అభివృద్ధిపై కూటమి ప్రభుత్వం దృష్టి సారించింది. గుడ్లవల్లేరు మండలం విన్నకోట గ్రామంలో సాస్కి నిధులు రూ.74 లక్షలతో చేపట్టనున్న రెండు కీలక రోడ్ల అభివృద్ధి పనులకు గుడివాడ ఎమ్మెల్యే వెనిగండ్ల రాము భూమిపూజ చేసి శంకుస్థాపన చేశారు.

విన్నకోట విలేజ్ రోడ్డు నుంచి సుబ్బి చెరువు రోడ్డు వరకు రూ.9 లక్షలతో, విన్నకోట ఆర్‌అండ్‌బీ రోడ్డు నుంచి కట్టమని చెరువు–చింతలకుంట రోడ్డు వరకు రూ.65 లక్షలతో అభివృద్ధి పనులు చేపట్టనున్నారు.

ఈ సందర్భంగా ఎమ్మెల్యే వెనిగండ్ల రాము మాట్లాడుతూ గ్రామీణ ప్రాంతాల్లో మెరుగైన రహదారి సౌకర్యాలు కల్పించడమే లక్ష్యంగా ప్రభుత్వం ప్రత్యేకంగా నిధులు కేటాయిస్తోందన్నారు. ప్రజల అవసరాలకు అనుగుణంగా రోడ్లు సహా మౌలిక వసతుల అభివృద్ధికి ప్రాధాన్యత ఇస్తున్నామని తెలిపారు.

కార్యక్రమంలో జనసేన ఇన్‌చార్జ్ బూరగడ్డ శ్రీకాంత్, మార్కెట్ యార్డ్ చైర్మన్ పొట్లూరి రవి, మండల టీడీపీ అధ్యక్షుడు పోలవరపు వెంకటరావు, కూటమి నాయకులు, పంచాయతీరాజ్ అధికారులు, స్థానిక ప్రజలు పాల్గొన్నారు.