దుర్గమ్మను దర్శించుకున్న విశాఖ ఎంపీ భరత్

విజయవాడ, అక్టోబర్ 12: దసరా శరన్నవరాత్రి మహోత్సవాల సందర్భంగా విశాఖపట్నం పార్లమెంట్ సభ్యుడు శ్రీభరత్ సోమవారం ఇంద్రకీలాద్రిపై శ్రీ కనకదుర్గమ్మను దర్శించుకున్నారు. శ్రీ గాయత్రీ దేవి అలంకారంలో కొలువుదీరిన అమ్మవారికి ప్రత్యేక ప్రార్థనలు చేశారు. దర్శనానంతరం వేద పండితులు ఆయనకు వేదాశీర్వచనం అందించగా, ఆలయ అధికారులు అమ్మవారి శేషవస్త్రం, ప్రసాదాలను అందజేశారు. ఈ సందర్భంగా ఎంపీ భరత్ మాట్లాడుతూ శరన్నవరాత్రుల వేళ దుర్గమ్మను దర్శించుకోవడం అదృష్టంగా భావిస్తున్నట్లు తెలిపారు. అమ్మవారి ఆశీస్సులతో రాష్ట్ర ప్రజలంతా సుఖసంతోషాలతో, ఆయురారోగ్యాలతో ఉండాలని ప్రార్థించినట్లు చెప్పారు. ఉత్సవాలకు తరలివస్తున్న భక్తులకు దేవస్థానం కల్పిస్తున్న సౌకర్యాలు, క్యూలైన్ల నిర్వహణ అభినందనీయంగా ఉన్నాయని పేర్కొన్నారు. భక్తులకు ఇబ్బందులు తలెత్తకుండా చర్యలు చేపడుతున్న ఆలయ యంత్రాంగాన్ని ప్రశంసించారు.