ఎన్నికల విధుల్లో నిర్లక్ష్యంపై వేటు

విజయవాడ, అక్టోబర్‌ 17: ఎన్నికల నిర్వహణ, శాంతిభద్రతల పరిరక్షణలో నిర్లక్ష్యం వహించే అధికారులను ఉపేక్షించబోమని రాష్ట్ర ఎన్నికల కమిషనర్‌ అనిల్‌ చంద్ర పునేఠా హెచ్చరించారు. విధుల్లో అలసత్వం ప్రదర్శించినట్లు గుర్తిస్తే నిబంధనల ప్రకారం సస్పెన్షన్‌, బదిలీ వంటి చర్యలు తీసుకుంటామని స్పష్టం చేశారు. ప్రతి అభ్యర్థికి సమాన అవకాశాలు కల్పిస్తూ, ఎన్నికల ప్రక్రియను ప్రశాంతంగా, పారదర్శకంగా, నిష్పక్షపాతంగా నిర్వహించేందుకు అధికారులు సమన్వయంతో పనిచేయాలని ఆదేశించారు. రాష్ట్ర ఎన్నికల కమిషన్‌ కార్యాలయంలో శనివారం నిర్వహించిన పాత్రికేయుల సమావేశంలో ఆయన మాట్లాడారు. నామినేషన్ల స్వీకరణ కేంద్రాల వద్ద పటిష్ట భద్రత ఏర్పాటు చేయాలని జిల్లా కలెక్టర్లు, పోలీసు కమిషనర్లు, ఎస్పీలు, మున్సిపల్‌ కమిషనర్లు, ఎన్నికల అధికారులకు స్పష్టమైన ఆదేశాలు ఇచ్చినట్లు తెలిపారు. కొన్ని ప్రాంతాల్లో శాంతిభద్రతల సమస్యలు తలెత్తిన వెంటనే సంబంధిత అధికారులను అప్రమత్తం చేసి పరిస్థితులను అదుపులోకి తెచ్చేందుకు చర్యలు చేపట్టామన్నారు. నామినేషన్‌ కేంద్రాల వద్ద సీసీ కెమెరాలతో నిరంతర నిఘా ఏర్పాటు చేయాలని, హైకోర్టు ఆదేశాలను కచ్చితంగా అమలు చేయాలని సూచించారు. నిర్దేశిత నిబంధనల ప్రకారం అభ్యర్థితోపాటు అనుమతించిన ముగ్గురు వ్యక్తులకు మాత్రమే ప్రవేశం కల్పించాలని స్పష్టం చేశారు. నిబంధనలు ఉల్లంఘించే వారిపై చట్టప్రకారం కఠిన చర్యలు తీసుకుంటామన్నారు. ఓటర్లు స్వేచ్ఛగా ఓటుహక్కు వినియోగించుకునే వాతావరణాన్ని కల్పించడమే లక్ష్యమని పేర్కొన్నారు. సమస్యాత్మక ప్రాంతాల్లో ప్రత్యేక భద్రత ఎన్నికల ప్రశాంత నిర్వహణకు అన్ని జిల్లాల్లో పటిష్ట పోలీసు బందోబస్తు ఏర్పాటు చేసినట్లు రాష్ట్ర ఎన్నికల కమిషన్‌ కార్యాలయానికి డిప్యూటేషన్‌పై నియమితులైన ఐజీ బి.రాజకుమారి తెలిపారు. డీజీపీ హరీష్‌కుమార్‌ గుప్తా ఆదేశాల మేరకు పోలీసు యంత్రాంగం అప్రమత్తంగా పనిచేస్తోందన్నారు. సమస్యాత్మక, అత్యంత సమస్యాత్మక పోలింగ్‌ కేంద్రాల పరిధిలో అవసరమైన భద్రతా ఏర్పాట్లకు జిల్లాల ఎస్పీలు చర్యలు తీసుకుంటున్నారని వివరించారు. ఇటీవల హింసాత్మక ఘటనలు జరిగిన ప్రాంతాల్లో పోలీసులు తక్షణమే స్పందించారని తెలిపారు. అన్నమయ్య జిల్లా ఎస్పీ ఘటనాస్థలికి చేరుకుని పరిస్థితిని సమీక్షించారన్నారు. నామినేషన్‌ కేంద్రాల వద్ద సీసీ కెమెరాలు, వీడియో చిత్రీకరణతోపాటు ప్రత్యేక బందోబస్తు ఏర్పాటు చేస్తున్నట్లు చెప్పారు. చిన్న ఘటన జరిగినా వెంటనే స్పందించి పరిస్థితిని అదుపులోకి తీసుకురావాలని అధికారులకు ఆదేశాలు ఇచ్చినట్లు పేర్కొన్నారు. సమావేశంలో రాష్ట్ర ఎన్నికల కార్యదర్శి డాక్టర్‌ ఏ.మల్లిఖార్జున పాల్గొన్నారు.