పేదల జీవితాల్లో చిరస్థాయిగా నిలిచే పట్టాభిషేకం

అమరావతి, సెప్టెంబర్‌ 30: విజయవాడ నగరంలో దశాబ్దాలుగా నివాసం ఉంటున్న పేదలకు ముఖ్యమంత్రి నారా చంద్రబాబు నాయుడు చేతుల మీదుగా శాశ్వత ఇంటి పట్టాలు అందించడం సంతోషకరమని టీడీపీ పశ్చిమ నియోజకవర్గ ఇన్‌ఛార్జి బుద్దా వెంకన్న అన్నారు. పేద కుటుంబాలకు ఆస్తిపై పూర్తి హక్కులు కల్పిస్తూ ముఖ్యమంత్రి తీసుకున్న నిర్ణయం వారి జీవితాల్లో చిరస్థాయిగా నిలిచిపోతుందని పేర్కొన్నారు. చంద్రబాబు ఒక మహర్షిలా ప్రజల భవిష్యత్తు కోసం ఆలోచిస్తూ పనిచేస్తున్నారని కొనియాడారు. ఆయన చేసిన ఈ మేలు లబ్ధిదారుల కుటుంబాలు జీవితాంతం గుర్తుంచుకుంటాయని తెలిపారు. ఎన్నికల సమయంలోనే చంద్రబాబు రాజకీయాల గురించి ఆలోచిస్తారని, అధికారంలోకి వచ్చిన తర్వాత రాష్ట్ర అభివృద్ధి, ప్రజల సంక్షేమమే లక్ష్యంగా పనిచేస్తారని చెప్పారు. వైసీపీ నాయకులకు రాష్ట్ర సంపదను దోచుకోవడం అలవాటైతే, చంద్రబాబుకు సంపద సృష్టించి ప్రజలకు పంచడం అలవాటని వ్యాఖ్యానించారు. జగన్‌ పాలనలో అవినీతి పూర్తిస్థాయిలో పెరిగి అభివృద్ధి శూన్యంగా మారిందని విమర్శించారు. కూటమి ప్రభుత్వం అధికారంలోకి వచ్చిన తర్వాత అభివృద్ధి కార్యక్రమాలు వేగం పుంజుకున్నాయని, చంద్రబాబు నాయకత్వంలో రాష్ట్రం ప్రగతిపథంలో ముందుకు సాగుతోందని బుద్దా వెంకన్న పేర్కొన్నారు.