భక్తులకు సంతృప్తికర దర్శనమే లక్ష్యం

విజయవాడ, అక్టోబర్ 11: దసరా శరన్నవరాత్రి మహోత్సవాల్లో భాగంగా ఇంద్రకీలాద్రిపై శ్రీ బాలాత్రిపురసుందరీ దేవి అలంకారంలో దర్శనమిస్తున్న కనకదుర్గమ్మను దర్శించుకునేందుకు భక్తులు తరలివస్తున్నారు. అమ్మవారి దర్శనానికి వచ్చే ప్రతి భక్తుడికి సంతృప్తికర దర్శనం కల్పించడమే లక్ష్యంగా అధికార యంత్రాంగం ప్రత్యేక చర్యలు చేపట్టింది. ముఖ్యంగా వయోవృద్ధులు, దివ్యాంగులకు ఇబ్బందులు తలెత్తకుండా బ్యాటరీ వాహనాలను అందుబాటులో ఉంచింది. భక్తుల రాకపోకలను క్రమబద్ధీకరిస్తూ దర్శన ఏర్పాట్లను అధికారులు పర్యవేక్షిస్తున్నారు. అమ్మవారి నామస్మరణతో ఇంద్రకీలాద్రిపై ఆధ్యాత్మిక వాతావరణం నెలకొంది.