చీపురు పట్టిన కమిషనర్‌
శేషమ్మ హాల్‌ రోడ్డులో ప్రత్యేక పారిశుద్ధ్య కార్యక్రమం చెత్త, ప్లాస్టిక్‌ వ్యర్థాలు, పిచ్చిమొక్కల తొలగింపు ప్రజల భాగస్వామ్యంతోనే స్వచ్ఛత సాధ్యమన్న యేసుబాబు
తాడేపల్లిగూడెం, సెప్టెంబర్ 23 : స్వచ్ఛత హి సేవ–2026లో భాగంగా తాడేపల్లిగూడెం పురపాలక సంఘం ఆధ్వర్యంలో బుధవారం ప్రత్యేక పారిశుద్ధ్య కార్యక్రమం నిర్వహించారు. పట్టణంలోని 8వ వార్డు ఎన్టీఆర్‌ విగ్రహం వద్ద నుంచి శేషమ్మ హాల్‌ రోడ్డులో స్పెషల్‌ గ్రేడ్‌ కమిషనర్‌ ఎం.యేసుబాబు నేతృత్వంలో రోడ్డు పక్కన పేరుకుపోయిన చెత్త, ప్లాస్టిక్‌ వ్యర్థాలు, పిచ్చిమొక్కలను తొలగించారు. కమిషనర్‌ స్వయంగా చీపురు పట్టి శ్రమదానం చేశారు. ఈ సందర్భంగా యేసుబాబు మాట్లాడుతూ పట్టణంలోని ప్రతి వార్డులో దశలవారీగా పారిశుద్ధ్య కార్యక్రమాలు చేపడుతున్నట్లు తెలిపారు. ప్రజలు రోడ్లపై చెత్త వేయకుండా తడి, పొడి చెత్తను వేరు చేసి మున్సిపల్‌ వాహనాలకు అందించాలని సూచించారు. ప్రజల భాగస్వామ్యంతోనే పరిశుభ్రమైన పట్టణ నిర్మాణం సాధ్యమవుతుందన్నారు. కార్యక్రమంలో మున్సిపల్‌ అధికారులు, సచివాలయ, పారిశుద్ధ్య సిబ్బంది, స్థానికులు పాల్గొన్నారు.
